தாரமங்கலம் அருகே பயங்கரம்: திருநங்கையாக மாற முயன்றதால் சுத்தியலால் தம்பி அடித்துக்கொலை-தொழிலாளி வெறிச்செயல்

தாரமங்கலம்:

தாரமங்கலம் அருகே திருநங்கையாக மாற முயன்றதால் தம்பியை, தொழிலாளி சுத்தியலால் அடித்துக்கொன்றார்.

இந்த பயங்கர சம்பவம் குறித்து போலீஸ் தரப்பில் கூறப்பட்டதாவது:-

சேலம் மாவட்டம் தாரமங்கலம் அருகே உள்ள துட்டம்பட்டி கிழக்குமேடு பகுதியை சேர்ந்தவர் மூர்த்தி. இவருடைய மகன்கள் செல்வராஜ் (வயது 22), அசோக்குமார் (17). இந்த நிலையில் கடந்த சில ஆண்டுகளுக்கு முன்பு இவர்களின் பெற்றோர் இறந்து விட்டனர். தொழிலாளர்களான அண்ணன், தம்பி 2 பேரும் தங்களது சித்தப்பா வீட்டில் வசித்து கொண்டு, கூலி வேலைக்கு சென்று வந்துள்ளனர். 

இந்த நிலையில், அசோக்குமாரின் உடலில் மாற்றம் ஏற்பட்டு திருநங்கைகளுக்கு உண்டான பாவனையுடன் நடந்து கொண்டதாக கூறப்படுகிறது. மேலும் அவர் திருநங்கையாக மாற முயன்றதாகவும் தெரிகிறது. இதனால் அடிக்கடி தனது தம்பியை, செல்வராஜ் திட்டி வந்துள்ளார். இதனிடையே அசோக்குமார் கடந்த 3 மாதத்திற்கு முன்பு யாரிடமும் சொல்லாமல் செங்கல்பட்டு சென்று ஒரு மாதம் தங்கி விட்டு வந்ததாக தெரிகிறது.

அதன்பிறகு அவர், தனது அண்ணன் செல்வராஜுடன் கூலி வேலைக்கு சென்று வந்துள்ளார். இந்த நிலையில் நேற்று காலை 10.30 மணி அளவில் நான் திரும்பவும் செங்கல்பட்டுவுக்கு செல்கிறேன் என்று அசோக்குமார், தனது அண்ணன் செல்வராஜிடம் தெரிவித்துள்ளார். செங்கல்பட்டு சென்றால் திருநங்கையாக மாறி விட வாய்ப்பு உள்ளது. எனவே அங்கு செல்லக்கூடாது என செல்வராஜ் அவரை தடுத்துள்ளார்.

இதனால் அவர்கள் 2 பேருக்கும் இடையே தகராறு ஏற்பட்டது. இதில் ஆத்திரம் அடைந்த செல்வராஜ் வீட்டில் இருந்த சுத்தியலால் சரமாரியாக அசோக்குமாரை தாக்கினார். இதில் படுகாயம் அடைந்த அவர் உயிருக்கு போராடினார். உடனே அக்கம்பக்கத்தினர் அசோக்குமாரை மீட்டு சிகிச்சைக்காக தாரமங்கலம் அரசு ஆஸ்பத்திரியில் சேர்த்தனர். பின்னர் அவரை மேல் சிகிச்சைக்காக சேலம் அரசு ஆஸ்பத்திரிக்கு கொண்டு சென்றனர். ஆனால் செல்லும் வழியிலேயே அசோக்குமார் பரிதாபமாக உயிரிழந்தார். 

இது குறித்த புகாரின் பேரில் தாரமங்கலம் போலீசார் வழக்குப்பதிவு செய்து, செல்வராஜை பிடித்து விசாரணை நடத்தி வருகிறார்கள். 

அண்ணனே தம்பியை சுத்தியலால் தாக்கி கொன்ற சம்பவம் தாரமங்கலம் பகுதியில் பெரும் பரபரப்பை ஏற்படுத்தி உள்ளது.