சென்னை ஆடிட்டர் கொலை வழக்கு தலைமறைவாக இருந்த 2 பேர் கோர்ட்டில் சரண்

கிருஷ்ணகிரி:

சென்னை ஆடிட்டர் கொலை வழக்கில் தலைமறைவாக இருந்த 2 பேர் கிருஷ்ணகிரி கோர்ட்டில் சரண் அடைந்தனர்.

ஆடிட்டர் கொலை 

சென்னை வேளச்சேரியை சேர்ந்தவர் ஆடிட்டர் ஜனரஞ்சன் பிரதான் (வயது 48). இவர் கடந்த 27-ந் தேதி கிருஷ்ணகிரிக்கு காரில் வந்தபோது மாயமானார். இது தொடர்பாக அவரது மனைவி பூர்ணிமா கிருஷ்ணகிரி டவுன் போலீசில் புகார் செய்தார். அதன் பேரில் போலீசார் விசாரணை நடத்தினார்கள்.

அதில் ஆடிட்டர் ஜனரஞ்சன் பிரதானை ஒரு கும்பல் கடத்தி சென்று கொலை செய்து உடலை சாமல்பட்டி அருகே மாந்தோப்பில் புதைத்தது தெரியவந்தது. இந்த கொலை தொடர்பாக சென்னையை சேர்ந்த வக்கீல் கிருஷ்ணகுமார், பெரம்பலூர் சபரீஷ், சாமல்பட்டி விடுதலை சிறுத்தைகள் கட்சி பிரமுகர் ஜிம் மோகன் உள்பட 9 பேரை போலீசார் கைது செய்தனர். பண விவகாரத்தில் இந்த கொலை நடந்தது விசாரணையில் தெரியவந்தது.

மேலும் கொலை செய்யப்பட்ட ஜனரஞ்சன் பிரதான் ரூ.30 கோடி லோன் வாங்கி தருவதாக சபரீசிடம் கூறியதாகவும், அதற்காக ரூ.3.50 கோடி கமிஷன் கேட்டதாகவும் கூறப்படுகிறது. இந்த தொகையை சபரீஷ், ஜனரஞ்சன் பிரதானிடம் கொடுத்த நிலையில், அந்த பணத்தை திருப்பி கொடுக்காததால் அவரை கிருஷ்ணகிரிக்கு அழைத்து வந்து தாக்கி மிரட்டினார்கள். இதில் ஜனரஞ்சன் பிரதான் இறந்ததால் அவரது உடலை சாமல்பட்டியில் மாந்தோப்பில் புதைத்தது விசாரணையில் தெரியவந்தது.

இந்த கொலை தொடர்பாக ஊத்தங்கரை தாலுகா சாமல்பட்டி அம்பேத்கர் நகரைச் சேர்ந்த முனியப்பன் (வயது 39), விஜி (29) ஆகிய 2 பேரையும் கிருஷ்ணகிரி டவுன் போலீசார் தேடி வந்தனர். இந்த நிலையில் அவர்கள் 2 பேரும் நேற்று கிருஷ்ணகிரி ஜே.எம்.1 கோர்ட்டில் மாஜிஸ்திரேட்டு செந்தில்பிரபு முன்னிலையில் சரண் அடைந்தனர்.

இதைத்தொடர்ந்து கோர்ட்டு உத்தரவுப்படி முனியப்பன், விஜி ஆகிய 2 பேரையும் போலீசார் சேலம் மத்திய சிறையில் அடைத்தனர். இந்த கொலை வழக்கில் 9 பேர் போலீசாரால் கைது செய்யப்பட்ட நிலையில், 2 பேர் தற்போது சரண் அடைந்துள்ளனர். இந்த வழக்கில் வேறு யாருக்கும் தொடர்பு உள்ளதா? என போலீசார் தீவிரமாக விசாரணை நடத்தி வருகிறார்கள்.