மோட்டார் சைக்கிள் மீது கார் மோதல்; 2 வாலிபர்கள் படுகாயம்

குளித்தலை மலையப்ப நகரை சேர்ந்தவர் மணிகண்டன் (வயது 23). இவர் அதே பகுதியை சேர்ந்த கார்த்திகேயன் (17) என்பவருடன் குளித்தலை அருகே உள்ள அய்யர்மலைக்கு நேற்று முன்தினம் மோட்டார் சைக்கிளில் சென்று கொண்டிருந்தார். 

குளித்தலை-மணப்பாறை சாலையில் உள்ள வை.புதூர் பகுதியில் சென்றுகொண்டிருந்தபோது எதிரே வந்த கார் ஒன்று மோட்டார் சைக்கிள் மீது மோதியது. 

இந்த விபத்தில் மோட்டார் சைக்கிளில் வந்த 2 வாலிபர்களும் படுகாயம் அடைந்தனர். இதையடுத்து, அந்த வழியாக சென்றவர்கள் அவர்கள் 2 பேரையும் மீட்டு குளித்தலை அரசு மருத்துவமனைக்கு அனுப்பி வைத்தனர். பின்னர், கார்த்திகேயன் மேல்சிகிச்சைக்காக திருச்சி அரசு மருத்துவமனையில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்து வருகிறார்கள். 

இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.