<
ரோல்ஸ் ராய்ஸ் காரின் மதிப்பு ரூ.5 லட்சம் தான். முன்னாள் அமைச்சர் கே.சி.வீரமணி பேட்டி
தனக்கு ரூ.40 கோடி கடன் இருப்பதாகவும், தன்னிடம் உள்ள ரோல்ஸ் ராய்ஸ் காரின்விலை ரூ.5 லட்சம்தான் என்றும் முன்னாள் அமைச்சர் கே.சி.வீரமணி கூறினார்.
திருப்பத்தூர்
தனக்கு ரூ.40 கோடி கடன் இருப்பதாகவும், தன்னிடம் உள்ள ரோல்ஸ் ராய்ஸ் காரின்விலை ரூ.5 லட்சம்தான் என்றும் முன்னாள் அமைச்சர் கே.சி.வீரமணி கூறினார்.
லஞ்ச ஒழிப்பு போலீசார் சோதனை
அ.தி.மு.க. முன்னாள் அமைச்சர் கே.சி.வீரமணி அமைச்சராக இருந்தபோது வருமானத்துக்கு அதிகமாக 654 சதவீதம் அளவுக்கு சொத்துகளை வாங்கிக் குவித்துள்ளதாக வேலூர் லஞ்சஒழிப்பு போலீசார் கடந்த 15&ந் தேதி வழக்குப் பதிவு செய்தனர்.
அதைத்தொடர்ந்து 16&ந் தேதி கே.சி.வீரமணி வீடு, கல்லூரி உள்பட அவருக்கு நெருக்கமானவர்கள், உறவினர்கள், அ.தி.மு.க. முக்கிய பிரமுகர்களின் வீடு என மொத்தம் 35 இடங்களில் ஒரே நேரத்தில் லஞ்ச ஒழிப்பு போலீசார் திடீர் சோதனையில் ஈடுபட்டனர்.
அப்போது ரூ.35 லட்சம் ரொக்கம், ரூ.1.80 லட்சம் மதிப்புள்ள வெளிநாட்டு டாலர் நோட்டுகள், 5 கிலோ தங்க நகைகள், 9 சொகுசு கார்கள், பல கோடி மதிப்புள்ள சொத்து ஆவணங்கள், வெள்ளிப் பொருட்கள் கைப்பற்றப்பட்டதாகவும், ஜோலார்பேட்டையில் உள்ள கே.சி.வீரமணியின் வீட்டில் ரூ.60 லட்சம் மதிப்பிலான 551 யூனிட் மணல் பதுக்கி வைக்கப்பட்டிருப்பதாகவும் கூறப்பட்டது.
இந்த நிலையில் திருப்பத்தூரில் முன்னாள் அமைச்சர் கே.சி.வீரமணி நேற்று நிருபர்களுக்கு பேட்டியளித்தார். அப்போது அவர் கூறியதாவது:-
கணக்கு காட்டியிருக்கிறேன்
லஞ்ச ஒழிப்பு போலீசார் எனது வீட்டில் இருந்து கோடிக்கணக்கான மதிப்புள்ள பொருட்களை பறிமுதல் செய்ததாக தொடர்ந்து தகவல்கள் பரப்பப்பட்டு வருகின்றன. என்னிடம் இருந்து 2 ஆயிரத்து 746 கிராம் தங்க நகைகள், அதாவது சுமார் 300 பவுன், 2,508 அமெரிக்க டாலர்கள் (இந்திய மதிப்பில் 1 லட்சத்து 80 ஆயிரம் ரூபாய்), ரொக்கப்பணமாக 10 ரூபாய்க் கட்டு ஒன்று (ரூ.1,000), இதுதவிர 4 ஆயிரத்து 600 ரூபாய் என மொத்தம் ரூ.5,600 மட்டுமே லஞ்ச ஒழிப்பு போலீசார் என்னிடம் இருந்து பறிமுதல் செய்திருந்தனர்.
நான் தேர்தலில் போட்டியிட்டபோது 300 பவுனுக்கும் அதிகமாக நகைகள் இருப்பதாகக் கணக்குக் காட்டியிருக்கிறேன். அதைக் குறிப்பிட்டு என்னுடைய நகைகள் என்னிடமே திருப்பி ஒப்படைக்கப்பட்டுவிட்டன. எனது மகள் ஆஸ்திரேலியாவில் கல்வி கற்க இருக்கிறார். அவர் வசதிக்காக அமெரிக்க டாலர்கள் வாங்கி வைத்திருந்தேன்.
ரூ.40 கோடி கடன்
நான் 7&ம் வகுப்பு படிக்கும்போதே பென்ஸ் கார் வைத்திருந்தேன். என்னிடம் ரோல்ஸ் ராய்ஸ் கார் உள்ளது. அது பழமையான கார். ரூ.5 லட்சம் மதிப்புடையது. நிலைமை இப்படி இருக்க, பொய்யான தகவல் மக்கள் மத்தியில் தொடர்ந்து பரப்பப்பட்டு வருகிறது. மணல் குவியல் இருக்கிறது என்கிறார்கள். புதிய கட்டுமானப் பணிகளுக்காக மணல் வாங்கி வைத்திருக்கிறோம். அதற்கான ஆவணங்கள், ரசீது என்னிடம் உள்ளன. 551 யூனிட் மணல் இருப்பதாக செய்தி வெளியாகிறது. யாருமே என்னுடைய வீட்டுக்குள் வரவில்லை. அப்படியிருக்க மணலை எப்படி அளந்திருக்க முடியும்.
நான் மிகவும் எளிமையானவன். ஆடம்பரத்தை விரும்பாதவன். எனக்கு ரூ.40 கோடி கடன் உள்ளது. கார்கள் மீதுதான் பிரியமே தவிர மற்றபடி எதுவும் என்னிடம் இல்லை. திட்டமிட்டுத் தவறான தகவல்கள் பரப்பப்படுகின்றன. உண்மை இதுதான். என் மீதான குற்றச்சாட்டுகளை சட்ட ரீதியாக எதிர்கொள்வேன்.
இவ்வாறு கே.சி.வீரமணி தெரிவித்தார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
