ரூ.1,000 லஞ்சம் வாங்கிய வழக்கு; அரசு அதிகாரிக்கு 9 ஆண்டு சிறை செங்கல்பட்டு கோர்ட்டு தீர்ப்பு

செங்கல்பட்டு,

செங்கல்பட்டு மாவட்டம், ஆதம்பாக்கம் பகுதியில் உள்ள தொழிலாளர் நல மையத்தில் உதவி ஆய்வாளராக பணிபுரிந்து வந்தவர் பத்மநாபன். இவரிடம் கடந்த 2008-ம் ஆண்டு இந்திய தேசிய தொழிலாளர் நல சங்க பொதுச்செயலாளர் ஆனந்தி என்பவர் 91 நபர்களுக்கு நலவாரிய அட்டை பெறுவதற்காக மனு அளித்துள்ளார்.தொழிலாளர் நலவாரிய அட்டை வழங்குவதற்காக ரூ.1,000-த்தை லஞ்சமாக உதவி ஆய்வாளர் பத்மநாபன் கேட்டுள்ளார்.

இதுகுறித்து லஞ்ச ஒழிப்புத்துறை போலீசாரிடம் ஆனந்தி புகார் அளிக்க அங்கு வந்து மறைந்து இருந்த லஞ்ச ஒழிப்பு போலீசார் பத்மநாபன் லஞ்சம் பெற்ற போது கையும், களவுமாக பிடித்து கைது செய்தனர்.

9 ஆண்டு சிறை

இந்த வழக்கு செங்கல்பட்டு தலைமை குற்றவியல் கோர்ட்டில் நடைபெற்று வந்த நிலையில் பத்மநாபனுக்கு 9 ஆண்டு சிறை தண்டனையும் ரூ.5 ஆயிரம் அபராதமும் விதித்து நீதிபதி பிரியா உத்தரவிட்டார்.

இதனைதொடர்ந்து பத்மநாதனுக்கு ஆஸ்பத்திரியில் உடல் பரிசோதனை செய்யப்பட்டு சென்னை புழல் சிறையில் அடைத்தனர்.