காய்கறி ஏற்றி வந்த ஆம்னி கார் தீப்பிடித்து எரிந்து நாசம் - போலீசார் விசாரணை

சென்னை,

கோடம்பாக்கம் ஆற்காடு சாலை கோகுலம் சிக்னல் அருகே நேற்று காலை காய்கறிகள் ஏற்றி வந்த ஆம்னி காரில் இருந்து திடீரென கரும்புகை வெளியேறியது. இதனை சுதாரித்துக்கொண்ட கார் டிரைவர் ராஜ் (வயது 28), தனது காரை சாலையோரம் நிறுத்தி விட்டு, உடனே காரில் இருந்து வெளியேறினார். அதற்குள் கார் மளமளவென தீ பிடித்து எரிய தொடங்கியது.

இந்த சம்பவம் குறித்து அப்பகுதியில் சென்ற வாகன ஓட்டிகள் தீயணைப்பு துறைக்கு தகவல் கொடுத்தனர். தகவல் அறிந்து வந்த அசோக்நகர் தீயணைப்பு நிலைய வீரர்கள் தண்ணீரை பீய்ச்சியடித்து தீயை அணைத்தனர். இதனால் அப்பகுதியில் சிறிது நேரம் பரபரப்பு ஏற்பட்டது. இந்த சம்பவம் குறித்து வழக்குப்பதிவு செய்த போலீசாரின் முதற்கட்ட விசாரணையில், காரில் மின்கசிவு காரணமாக தீ விபத்து ஏற்பட்டதாக தெரியவந்துள்ளது. இதுகுறித்து கோடம்பாக்கம் போலீசார் விசாரணை நடத்தி வருகின்றனர்.