ஆற்றில் மூழ்கி பிளஸ்-2 மாணவர் பலி

திருச்சி மாவட்டம், முசிறி அருகே உள்ள மண்பறை சந்தனப்பட்டி பகுதியை சேர்ந்தவர் மாரிமுத்து. இவருடைய மகன் நவீன்(வயது 17). இவர் அப்பகுதியில் உள்ள அரசு மேல்நிலைப்பள்ளியில் பிளஸ்-2 படித்து வந்தார். நேற்று காலை நண்பர்கள் 5 பேருடன் முக்கொம்பு சுற்றுலா மையத்திற்கு வந்த அவர், காவிரி ஆற்றில் மேலணை 2-வது மதகு பகுதியில் குளித்து கொண்டிருந்தார். அப்போது அவர் ஆழமான பகுதிக்கு சென்றதால் நீரில் மூழ்கினார். இதனைப் பார்த்து சக நண்பர்கள் கூச்சலிடவே, அருகில் இருந்தவர்கள் ஓடிவந்து மாணவரை காப்பாற்ற முயன்றனர். ஆனால், ஆழமான பகுதிக்கு சென்றதால் காப்பாற்ற முடியவில்லை. இதுகுறித்த தகவலின்பேரில், திருச்சி தீயணைப்பு வீரர்கள் சம்பவ இடத்திற்கு விரைந்து வந்து மாணவரின் உடலை தேடினர். சிறிது நேரத்திற்கு பிறகு நவீனை பிணமாகத்தான் மீட்க முடிந்தது. பின்னர் மாணவரின் உடல் பிரேத பரிசோதனைக்காக திருச்சி அரசு மருத்துவமனைக்கு அனுப்பி வைக்கப்பட்டது. இதுகுறித்து ஜீயபுரம் போலீஸ் இன்ஸ்பெக்டர் பாலாஜி வழக்குப்பதிவு செய்து விசாரணை நடத்தி வருகிறார்.