பொன்னேரி அருகே பரிதாபம் கணவன்-மனைவி விஷம் குடித்து தற்கொலை

பொன்னேரி,

பொன்னேரி அருகே தடபெரும்பக்கம் ஊராட்சியில் வசிப்பவர் ஜெயராமன் (வயது 70). கூலித்தொழிலாளி. இவரது மனைவி ராஜம்மாள் (55). இவர் தேசிய வேலை உறுதி திட்டத்தின் கீழ் தடபெரும்பாக்கம் ஊராட்சியில் 100 நாள் வேலை திட்டத்தில் வேலை செய்து வந்தார்.

இவர்களுக்கு 2 மகளும், 1 மகனும் உள்ளனர். இவர்கள் மூவரும் திருமணமாகி குடும்பத்துடன் தனியாக வசித்து வருகின்றனர்.

இந்நிலையில் கணவர் ஜெயராமன் வயது முதிர்வின் போது பக்கவாத நோயால் அவதிப்பட்டு வந்துள்ளார். அவரை சரிவர கவனிக்க முடியாமல் ராஜம்மாள் தவித்து வந்ததாக தெரிகிறது.

வறுமையில் வாடி வந்த தம்பதியினர் மருத்துவம் பார்க்க முடியாமல் மனமுடைந்த நிலையில், தற்கொலை செய்து கொள்ள முடிவு எடுத்தனர்.

இதனையடுத்து நேற்று வீட்டில் தம்பதியினர் இருவரும் அரளிவிதையை அரைத்து குடித்ததாக கூறப்படுகிறது.

இருவரும் பலி

வாயில் நுரை தள்ளிய நிலையில், மயங்கி கிடப்பதை அறிந்து அக்கம்பக்கத்தினர் ஓடி வந்து பார்த்தபோது, ஜெயராமன் பரிதாபமாக உயிரிழந்து கிடந்தது தெரியவந்தது. ராஜம்மாள் உயிருக்கு போராடிய நிலையில் கிடப்பதை கண்ட அவர்கள் மீட்டு, பொன்னேரி அரசு ஆஸ்பத்திரிக்கு சிகிச்சைக்காக அனுமதித்தனர்.

இந்த நிலையில் சிகிச்சை பலனின்றி அவரும் பரிதாபமாக உயிரிழந்தார். இதுகுறித்து தகவலறிந்த பொன்னேரி போலீசார் தம்பதிகள் உடலை கைப்பற்றி பிரேத பரிசோதனைக்காக பொன்னேரி அரசு ஆஸ்பத்திரிக்கு அனுப்பி வைத்தனர். இந்த தற்கொலை சம்பவம் குறித்து பொன்னேரி போலீசார் வழக்குப்பதிவு செய்து விசாரித்து வருகின்றனர்.

வறுமை காரணமாக வயதான தம்பதினர் விஷம் குடித்து பலியான சம்பவம் அப்பகுதியில் பெரும் சோகத்தை ஏற்படுத்தி உள்ளது.