தூத்துக்குடியில் நண்பர்களுக்குள் மோதல் 11பேர் மீது வழக்கு

தூத்துக்குடி அருகே உள்ள முத்தையாபுரம் மகிழ்ச்சிபுரத்தை சேர்ந்தவர் ஆறுமுகம். இவருடைய மகன் மதன்ராஜ் (வயது 20). கட்டிட தொழிலாளி. இவரும், நண்பர்கள் சிலரும், தூத்துக்குடி அண்ணாநகர் 4-வது தெருவில் உள்ள நண்பர் வீட்டில் வைத்து மது குடித்தார்களாம். அப்போது அவர்களுக்கு இடையே வாக்குவாதம் ஏற்பட்டது. இதில் ஆத்திரம் அடைந்த மதன்ராஜ், அவரது நண்பர் வெங்கடேஷ் (19) ஆகியோர் இருபிரிவுகளாக பிரிந்து ஒருவரையொருவர் தாக்கி கொண்டனர். இதில் மதன்ராஜ், வெங்கடேஜ் ஆகியோர் காயம் அடைந்தனர். அவர்கள் தூத்துக்குடி அரசு ஆஸ்பத்திரியில் சிகிச்சைக்காக சேர்க்கப்பட்டனர்.

இதுகுறித்து இருதரப்பினர் அளித்த புகாரின் பேரில் 11 பேர் மீது தென்பாகம் போலீசார் வழக்குப்பதிவு செய்தனர். தொடர்ந்து வெங்கடேஷ், மதன்ராஜ் உள்பட 4 பேரை கைது செய்து விசாரணை நடத்தி வருகின்றனர்.