வழிப்பறி திருடன் மீது குண்டர் சட்டம் பாய்ந்தது

திருச்சி கண்டோன்மெண்ட் முல்லைநகரில் வசித்து வருபவர் பாலசுப்பிரமணியன் (வயது 35). இவர், கடந்த மாதம் 18-ந் தேதி திருச்சி மத்திய பஸ் நிலையத்தில் நின்று கொண்டிருந்தார். அப்போது அங்கு வந்த திருச்சி கருமண்டபம், ஆல்பா நகர், 3-வது தெருவை சேர்ந்த ஆனந்தகுமார் (22), கருமண்டபம், ஜே.ஆர்.எஸ். நகரைச் சேர்ந்த குமரன் என்ற முத்தமிழ்குமரன் (32) ஆகியோர் பாலசுப்பிரமணியத்தை கத்தியை காட்டி மிரட்டி அவரிடமிருந்து ரூ.1,500-ஐ பறித்து கொண்டு சென்றனர்.
இது குறித்து கண்டோன்மெண்ட் போலீசார் வழக்குப்பதிவு செய்து இருவரையும் கைது செய்து சிறையில் அடைத்தனர். இந்த வழக்கில் தொடர்புடைய ஆனந்தகுமார் மீது ஏற்கனவே, திருச்சி போலீஸ் நிலையங்களில் 5 வழக்குகள் பதிவு செய்யப்பட்டு நிலுவையில் உள்ளது. எனவே, அவரை குண்டர் சட்டத்தின் கீழ் சிறையில் அடைக்ககண்டோன்மெண்ட் இன்ஸ்பெக்டர் முருகவேல், போலீஸ் கமிஷனர் கார்த்திகேயனுக்கு பரிந்துரை செய்தார். அதை அவர் ஏற்று, ஆனந்தகுமாரை குண்டர் சட்டத்தின் கீழ் நேற்று சிறையில் அடைக்க உத்தரவிட்டார்.