உத்தனப்பள்ளி அருகே பெண்ணுக்கு அரிவாள் வெட்டு தொழிலாளி கைது

ராயக்கோட்டை:

உத்தனப்பள்ளி அருகே உள்ள வரகானப்பள்ளியை சேர்ந்தவர் மாதையன். இவருடைய மனைவி சம்பு (வயது53). இவர் அப்பகுதியில் உள்ள குழாயில் நேற்று தண்ணீர் பிடித்து கொண்டிருந்தார். அப்போது அங்கு வந்த அதே பகுதியை சேர்ந்த கூலித்தொழிலாளி கந்தன் (47) என்பவர் சம்புவை தகாத வார்த்தையால் திட்டி, அரிவாளால் வெட்டினார். இதில் சம்புவின் இரு கைகளிலும் படுகாயம் ஏற்பட்டது. இதை பார்த்த அக்கம் பக்கத்தினர் அவரை மீட்டு தேன்கனிக்கோட்டை அரசு மருத்துவமனைக்கு அனுப்பி வைத்தனர். இது குறித்த புகாரின் பேரில் உத்தனப்பள்ளி போலீசார் வழக்குப்பதிவு செய்து கந்தனை கைது செய்தனர்.