ஆட்டோ டிரைவர் உள்பட 2 பேர் கைது

வத்தலக்குண்டு: 

வத்தலக்குண்டு அருகே எழுவனம்பட்டியில் கடந்த 5-ந்தேதி சுரேஷ், சுப்புராஜ் ஆகியோர் வீடுகளில் பூட்டை உடைத்து நகைகளை மர்ம நபர்கள் திருடி சென்றனர். இதுகுறித்து வத்தலக்குண்டு போலீசார் வழக்குப்பதிவு செய்து விசாரணை நடத்தினர். இதை தொடர்ந்து நிலக்கோட்டை போலீஸ் துணை சூப்பிரண்டு சுகுமாறன், வத்தலக்குண்டு இன்ஸ்பெக்டர் குமரன், சப்-இன்ஸ்பெக்டர் கண்ணா காந்தி ஆகியோர் தலைமையில் தனிப்படை போலீசார் மர்ம நபர்களை தேடி வந்தனர். 

இந்த நிலையில் நேற்று வத்தலக்குண்டு பைபாஸ் சாலையில் கன்னிமார் கோவில் அருகே போலீசார் வாகன சோதனையில் ஈடுபட்டனர். அப்போது அந்த வழியாக ஆட்டோவில் சந்தேகப்படும்படி வந்த 2 பேரை பிடித்து விசாரித்தனர். 

விசாரணையில், அவர்கள் வத்தலக்குண்டுவை சேர்ந்த ஆட்டோ டிரைவரான சூரியபிரகாஷ் (வயது 28), தேனி மாவட்டம் போடியை சேர்ந்த விஜய் (25) என்பதும், அவர்கள் எழுவனம்பட்டியில் வீடுகளில் நகைகள் திருடியதும் தெரியவந்தது. இதுகுறித்து போலீசார் வழக்குப்பதிந்து அவர்களை கைது செய்தனர். மேலும் 11 பவுன் நகைகள், ஆட்டோ பறிமுதல் செய்யப்பட்டது.