தம்பதியை தாக்கிய 4 பேர் மீது வழக்குப்பதிவு

க.பரமத்தி அருகே அய்யம்பாளையம் பிரிவைச் சேர்ந்தவர் ஜெயக்குமார். இவரது மனைவி சினேகா (வயது 20). இவர் தனது வீட்டின் அருகே கடந்த 16-ந் தேதி மாடு மேய்த்துக் கொண்டிருந்தார். அப்போது அருகில் உள்ள தனியார் நிறுவனத்தில்  வேலை பார்க்கும் மதுரை மாவட்டம் மேலூர் அருகே உள்ள அட்டப்பட்டியை சேர்ந்த அருண்பாண்டியன் என்பவர், சினேகாவை தவறாக பேசியதாக கூறப்படுகிறது. இதுகுறித்து தகவல் அறிந்த ஜெயக்குமார், மாமனார் ராமலிங்கம் (48) ஆகியோர் அருண்பாண்டியனை கண்டித்துள்ளனர். இந்தநிலையில் அருண்பாண்டியன் தனது உறவினரான ஆனந்த் (25), அய்யனார், தர்மர் ஆகியோருடன் சினேகா வீட்டிற்குச் சென்று அங்கிருந்த ஜெயக்குமார், ராஜேஸ்வரி மற்றும் ராமலிங்கம், ஜெகநாதன்  ஆகியோரை பீர் பாட்டிலால் தாக்கியுள்ளனர். இதனை கண்ட ஊர்மக்கள் சம்பவ இடத்திற்கு வந்தனர். அப்போது அருண்பாண்டியன், அய்யனார், தர்மர் ஆகிய 3 பேரும் அங்கிருந்து ஓடி விட்டனர். ஆனந்தை பிடித்த ஊர் மக்கள் அவரை அடித்துள்ளனர். இதுகுறித்து தகவல் அறிந்த க.பரமத்தி போலீஸ் இன்ஸ்பெக்டர் ராதாகிருஷ்ணன், சப்-இன்ஸ்பெக்டர் தர்மலிங்கம் ஆகியோர் சம்பவ இடத்திற்கு வந்து ஆனந்தை மீட்டனர். பின்னர் தம்பதி உள்ளிட்டோரை பீர் பாட்டிலால் தாக்கியதாக அருண்பாண்டியன் உள்பட 4 பேர் மீதும் வழக்குப்பதிவு செய்து விசாரணை நடத்தி வருகின்றனர்.