செல்போன் திருடிய 2 சிறுவர்கள் கைது செய்யப்பட்டனர்.

ஓசூர்:

ஓசூர் பேகேப்பள்ளி அருகே எழில் நகர் மகாலட்சுமி லேஅவுட் பகுதியை சேர்ந்தவர் பிரகாஷ் (வயது 26). டான்ஸ் மாஸ்டர். சம்பவத்தன்று இவர் எழில் நகர் பகுதியில் மோட்டார் சைக்கிளில் சென்றார். அவர் செல்போனை, மோட்டார் சைக்கிளின் பெட்ரோல் டேங்க் முன்புற கவரில் வைத்திருந்தார். அப்போது, அந்த வழியாக மோட்டார் சைக்கிளில் வந்த 2 பேர் பிரகாசின் செல்போனை திருடி தப்பி செல்ல முயன்றனர். இதை கவனித்த பிரகாஷ், அக்கம் பக்கத்தினர் உதவியுடன் அவர்கள் 2 பேரையும் மடக்கி பிடித்து ஓசூர் சிப்காட் போலீசில் ஒப்படைத்தார். பிடிபட்ட 2 பேரிடம் போலீசார் நடத்திய விசாரணையில், அவர்கள் ஓசூர் பகுதியை சேர்ந்த 17 மற்றும் 18 வயதுடைய சிறுவர்கள் என்பது தெரியவந்தது. பின்னர் அவர்கள் 2 பேரும் கைது செய்யப்பட்டனர்.