தீபாவளி பண்டிகையின்போது தூத்துக்குடி மாவட்டத்தில் பொதுமக்களுக்கு இடையூறு செய்வோர் மீது கடும் நடவடிக்கை எடுக்க போலீசாருக்கு போலீஸ் சூப்பிரண்டு ஜெயக்குமார் உத்தரவிட்டுள்ளார்

தீபாவளி பண்டிகையையொட்டி பொதுமக்களுக்கு இடையூறு செய்வோர் மீது கடும் நடவடிக்கை எடுக்க போலீசாருக்கு போலீஸ் சூப்பிரண்டு ஜெயக்குமார் அறிவுறுத்தினார். 

தூத்துக்குடி மாவட்டத்தில் தீபாவளி பண்டிகையை முன்னிட்டு 3 கூடுதல் போலீஸ் சூப்பிரண்டுகள் தலைமையில் 1,500 போலீசார் ரோந்து பணியில் ஈடுபடுத்தப்பட உள்ளனர். இதுதொடர்பான ஆலோசனை கூட்டம் மாவட்ட போலீஸ் சூப்பிரண்டு அலுவலகத்தில் நடந்தது. 

கூட்டத்துக்கு போலீஸ் சூப்பிரண்டு ஜெயக்குமார் தலைமை தாங்கி பேசினார். 

அப்போது அவர், மாவட்டத்தில் ரவுடிகள் மற்றும் பழைய கொலை குற்றாவாளிகள் கண்காணிக்கப்பட்டு அவர்கள் மீது நடவடிக்கை எடுக்க வேண்டும். தீபாவளியை முன்னிட்டு மாவட்டத்தில் உள்ள தியேட்டர்களில் பாதுகாப்பு பணியில் போலீசார் ஈடுபடுத்தப்பட வேண்டும். 

தடை செய்யப்பட்ட பட்டாசுகள் விற்பனை மற்றும் அரசால் அறிவிக்கப்பட்ட நேரத்தை மீறி பட்டாசு வெடிப்பவர்கள் மீதும், பொது இடங்களில் மது அருந்திவிட்டு பொதுமக்களுக்கு இடையூறு விளைவிப்பவர்கள், குடிபோதையில் வாகனம் ஓட்டுபவர்கள், இருசக்கர வாகன வேகப்பந்தயத்தில் ஈடுபடுவது, மதுபானம் மற்றும் போதைப்பொருள் கடத்தல், விற்பனை போன்ற சட்ட விரோத செயல்களில் ஈடுபடுபவர்கள் மீதும் கடும் நடவடிக்கை எடுக்க வேண்டும் என்று அறிவுறுத்தினார். மேலும் மழை வெள்ளத்தால் பாதிக்கப்பட்டவர்களை உடனடியாக மீட்பது குறித்தும் ஆலோசனைகள் வழங்கினார். 

கூட்டத்தில் கூடுதல் போலீஸ் சூப்பிரண்டுகள் கோபி, இளங்கோவன், உதவி போலீஸ் சூப்பிரண்டுகள் ஹர்ஷ்சிங், சந்தீஸ், துணை போலீஸ் சூப்பிரண்டுகள் கணேஷ், வெங்கடேசன், சங்கர், உதயசூரியன், சம்பத், கண்ணன், பிரகாஷ், பாலாஜி மற்றும் அலுவலர்கள் கலந்து கொண்டனர்.