ஆலங்குளம் அருகே டிரைவர் கொலையில் நண்பர் கைது

ஆலங்குளம்:

ஆலங்குளம் அருகே ஆ.மருதப்புரத்தைச் சேர்ந்தவர் தங்கபாண்டி. இவருடைய மகன் முருகன் என்ற கபாலி (வயது 25). லாரி டிரைவர். அதே பகுதியைச் சேர்ந்தவர் மற்றொரு முருகன் என்ற பண்ணையார் (28). நண்பர்களான இவர்கள் 2 பேரும் அடிக்கடி ஒன்றாக அமர்ந்து மது அருந்துவது வழக்கம்.

கடந்த மாதம் 22-ந்தேதி கபாலி, முருகன் ஆகிய 2 பேரும் மது அருந்தியபோது, தேர்தல் தொடர்பாக அவர்களுக்கு இடையே வாக்குவாதம் ஏற்பட்டது. இதில் ஆத்திரம் அடைந்த முருகன் கம்பால் கபாலியை சரமாரியாக தாக்கினார். இதில் படுகாயம் அடைந்த கபாலியை பாளையங்கோட்டை அரசு ஆஸ்பத்திரியில் அனுமதித்து தீவிர சிகிச்சை அளித்தனர். ஆனாலும் சிகிச்சை பலனின்றி அவர் பரிதாபமாக இறந்தார். இதையடுத்து ஆலங்குளம் போலீசார் கொலை வழக்குப்பதிவு செய்து முருகனை கைது செய்தனர்.