விபத்து

சிவகாசி, 

வெவ்வேறு சாலை விபத்தில் 4 பேர் படுகாயம் அடைந்தனர். 

சிவகாசி காமாக் ரோட்டை சேர்ந்தவர் அழகர்சாமி என்கிற ராஜாராம் (வயது 67). இவர் சிவகாசி-விருதுநகர் ரோட்டில் நடந்து வந்து கொண்டிருந்தார். அப்போது அந்த வழியாக சென்ற மோட்டார் சைக்கிள் அவர் மீது மோதியது. இதில் காயம் அடைந்த அழகர்சாமி மதுரையில் உள்ள ஒரு தனியார் ஆஸ்பத்திரியில் சிகிச்சை பெற்று வருகிறார். இந்த விபத்து குறித்து சிவகாசி கிழக்கு போலீசார் வழக்குப்பதிவு செய்து விசாரணை நடத்தி வருகிறார்கள். 

சிவகாசி அருகே உள்ள மீனம்பட்டியை சேர்ந்த பாண்டியன் என்பவர் தனது மனைவி மற்றும் 2 குழந்தைகளுடன் மோட்டார் சைக்கிளில் சிவகாசி- விருதுநகர் ரோட்டில் சென்று கொண்டிருந்தார். அப்போது அந்த வழியாக பார்த்திபன் என்பவர் ஓட்டி வந்த மோட்டார் சைக்கிள் பாண்டியன் வாகனத்தின் மீது மோதியது. இதில் மோட்டார் சைக்கிளில் பயணம் செய்த 4 பேரும் நிலைதடுமாறி கீழே விழுந்தனர். அப்போது அந்த வழியாக வந்த பஸ் ஒன்று பாண்டியனின் மனைவி முருகேஸ்வரி (28) மீது மோதியதில் காலில் காயம் ஏற்பட்டது. இது குறித்து பாண்டியன் சிவகாசி கிழக்கு போலீசில் புகார் கொடுத்தார். அதன் பேரில் போலீசார் வழக்குப்பதிவு செய்து விசாரணை நடத்தி வருகிறார்கள். 

அருப்புக்கோட்டை திருக்குமரன் நகர் பருப்புமில் தெருவை சேர்ந்தவர் வேல்முருகன். இவரது மகன் விக்னேஸ்வரபாண்டியன் (23). இவர் தனது மோட்டார் சைக்கிளில் பொய்யாங்குளத்தில் இருந்து பாளையம்பட்டி செல்வதற்காக முத்தரையர் நகர் விலக்கு அருகே மதுரை-தூத்துக்குடி நான்கு வழிச்சாலையை கடக்க முயன்றுள்ளார். அப்போது காந்திநகரில் இருந்து மதுரை நோக்கி சென்ற சவ்வாஸ்புரத்தை சேர்ந்த வீரபாண்டி என்பவர் மகன் அபிமன்யு (23) ஓட்டிச்சென்ற மோட்டார் சைக்கிள் விக்னேஸ்வரபாண்டியன் மீது மோதியது. 

இந்த விபத்தில் அவர்கள் இருவரும் படுகாயம் அடைந்தனர். இதையடுத்து அவர்கள் 108 ஆம்புலன்ஸ் மூலம் அருப்புக்கோட்டை அரசு ஆஸ்பத்திரிக்கு சிகிச்சைக்காக கொண்டு செல்லப்பட்டனர். இந்த விபத்து குறித்து டவுன் போலீசார் வழக்குப்பதிவு செய்து விசாரணை மேற்கொண்டு வருகின்றனர்.