விவசாயியை கல்லால் தாக்கியவர் கைது

தோகைமலை அருகே உள்ள கோம்பையூர் பகுதியை சேர்ந்தவர் மணிவேல் (வயது 26), விவசாயி. இவருக்கும், இதே பகுதியை சேர்ந்த ராமன் (35) என்பவருக்கும் இடையே நிலத்தகராறு உள்ளது. நேற்று முன்தினம் மணிவேல் தனது தோட்டத்தில் வேலி அமைத்து கொண்டிருந்தார். அப்போது அங்கு வந்த ராமன் மற்றும் அவரது உறவினர்களான மூக்காயி (30), பழனியம்மாள் (50) ஆகியோர் மணிவேலிடம் தகராறு செய்து உள்ளனர். பின்னர் அவரை தகாத வார்த்தைகளால் திட்டி, கல்லால் தாக்கி உள்ளனர்.

இதனைகண்டு அதிர்ச்சி அடைந்த அப்பகுதி மக்கள் அவர்கள் 3 பேரையும் பிடிக்க முயன்றனர். ஆனால் அவர்கள் அங்கிருந்து தப்பி ஓடிவிட்டனர். இதையடுத்து காயம் அடைந்த மணிவேலை மீட்டு கரூர் அரசு மருத்துவமனையில் சிகிச்சைக்காக அனுமதித்தனர். இந்த சம்பவம் குறித்து மணிவேல் கொடுத்த புகாரின் பேரில் தோகைமலை போலீசார் ராமனை கைது செய்தனர். மேலும் தலைமறைவாக உள்ள மூக்காயி, பழனியம்மாள் ஆகியோரை வலைவீசி தேடி வருகின்றனர்.