நாமக்கல் கோர்ட்டில் முன்னாள் அமைச்சர் சரோஜா முன்ஜாமீன் மனு விசாரணை மீண்டும் தள்ளிவைப்பு

நாமக்கல்:

நாமக்கல் மாவட்டம், ராசிபுரத்தில் உள்ள புதுப்பாளையம் சாலையில் வசித்து வருபவர் குணசீலன் (வயது 65). ஓய்வு பெற்ற கூட்டுறவு சங்க மேலாளரான இவர் தமிழக முன்னாள் அமைச்சர் டாக்டர் சரோஜாவின் உறவினர் ஆவார். இவர் 15 பேருக்கு சத்துணவு திட்டத்துறையில் வேலை கேட்டு முன்னாள் அமைச்சர் சரோஜா மற்றும் அவரது கணவர் லோகரஞ்சன் ஆகியோரிடம் ரூ.76½ லட்சம் வழங்கியதாகவும், ஆனால் அவர்கள் வேலை ஏதும் வாங்கி தரவில்லை எனவும் ராசிபுரம் போலீசில் புகார் செய்தார்.

அதன்பேரில் முன்னாள் அமைச்சர் சரோஜா மற்றும் அவரது கணவர் மீது நம்பிக்கை மோசடி உள்பட 3 பிரிவுகளின் கீழ் கடந்த மாதம் 26-ந் தேதி போலீசார் வழக்குப்பதிவு செய்தனர். இதனிடையே இந்த வழக்கில் முன்ஜாமீன் கேட்டு முன்னாள் அமைச்சர் சரோஜா தரப்பில் நாமக்கல் மாவட்ட முதன்மை கோர்ட்டில் கடந்த 29-ந் தேதி மனு தாக்கல் செய்யப்பட்டது. பின்னர் கடந்த 1-ந் தேதி அந்த மனு மீதான விசாரணை ஒத்திவைக்கப்பட்டது. இந்த நிலையில் நேற்று மீண்டும் 2-வது முறையாக முன்னாள் அமைச்சர் சரோஜாவின் முன்ஜாமீன் மனு நாமக்கல் மாவட்ட முதன்மை கோர்ட்டில் நீதிபதி குணசேகரன் முன்னிலையில் விசாரணைக்கு வந்தது. அப்போது அந்த மனு மீதான விசாரணையை வருகிற 15-ந் தேதிக்கு தள்ளிவைத்து நீதிபதி குணசேகரன் உத்தரவிட்டார்.