<
ரூ9 லட்சம் வழிப்பறி செய்த 4 பேர் கைது
திருப்பூரில் கத்தி முனையில் டாஸ்மாக் மேற்பார்வையாளரிடம் ரூ.9 லட்சத்து 12 ஆயிரத்து 350-ஐ வழிப்பறி செய்த 4 பேரை போலீசார் கைது செய்தனர்.
நல்லூர்
திருப்பூரில் கத்தி முனையில் டாஸ்மாக் மேற்பார்வையாளரிடம் ரூ.9 லட்சத்து 12 ஆயிரத்து 350-ஐ வழிப்பறி செய்த 4 பேரை போலீசார் கைது செய்தனர்.
இந்த சம்பவம் குறித்து போலீஸ் தரப்பில் கூறப்படுவதாவது:-
டாஸ்மாக் கடை
திருப்பூர் அருகே முதலிபாளையம் சிட்கோ செல்லும் வழியில் காட்டுப்பகுதியில் டாஸ்மாக் கடை மற்றும் பார் செயல்பட்டு வருகிறது. அந்த டாஸ்மாக் கடையில் செல்லமுத்து, மூர்த்தி ஆகிய 2 பேரும் விற்பனையாளராக வேலை செய்து வருகிறார்கள். மேற்பார்வையாளராக ஈரோடு மாவட்டம், பெருந்துறை டீச்சர்ஸ் காலனி பகுதியை சேர்ந்த மைக்கேல் என்பவரது மகன் ராஜபிரகாஷ் பணியாற்றி வருகிறார்.
இந்த நிலையில் கடந்த 1-ந்தேதி ராஜபிரகாஷ் பெருந்துறையில் இருந்து ஒரு காரில் தனது தம்பி ரமேசை அழைத்துக்கொண்டு டாஸ்மாக் கடைக்கு வந்தார். பின்னர் கடையில் இருந்து வசூல் பணம் ரூ.9 லட்சத்து 12 ஆயிரத்து 350- ஐ எடுத்துக்கொண்டு வங்கியில் செலுத்துவதற்காக சென்றார். அப்போது ஒரு மோட்டார் சைக்கிளில் 30 வயது மதிக்கத்தக்க 2 பேர் வந்தனர்.
அவர்களில் மோட்டார் சைக்கிளை ஓட்டியவர் மட்டும் ஹெல்மெட் அணிந்து இருந்தார். மற்றொருவர் ஹெல்மெட் அணியவில்லை. அதில் ஹெல்மெட் அணியாத ஆசாமி மட்டும் டாஸ்மாக் கடைக்கு சென்று ஒரு மதுபாட்டிலை வாங்கினார். பின்னர் அந்த ஆசாமி மதுபாட்டிலை ராஜபிரகாஷின் கார் மீது வீசினார். இதில் கார் கண்ணாடி நொறுங்கியது. பின்னர் அந்த ஆசாமிகள் கத்தியால் ராஜபிரகாசை மிரட்டி பணப்பையை பறித்துக்கொண்டு மோட்டார் சைக்கிளுடன் தப்பிச்சென்றனர். பட்டப்பகலில் நடந்த இந்த சம்பவம் பரபரப்பை ஏற்படுத்தியது.
தனிப்படை அமைப்பு
இந்த சம்பவம் தொடர்பாக நல்லூர் போலீசார் வழக்குப்பதிவு செய்து மர்ம ஆசாமிகளை தேடி வந்தனர். மேலும் வழிப்பறியில் ஈடுபட்ட ஆசாமிகளை பிடிக்க போலீஸ் கமிஷனர் வனிதா உத்தரவின் பேரில், துணை கமிஷனர் ரவி, உதவி கமிஷனர்கள் லட்சுமணகுமார், வரதராஜன், இன்ஸ்பெக்டர்கள் ரமேஷ், ஆனந்த் ஆகியோர் கொண்ட தனிப்படை அமைக்கப்பட்டது.
4 பேர் கைது
இந்த தனிப்படை போலீசார் தீவிர விசாரணை மேற்கொண்டு வழிப்பறியில் ஈடுபட்ட நெல்லை மாவட்டம் திசையன்விளையை சேர்ந்த இசக்கிபாண்டியன் என்பரின் மகன் செந்தில்குமார் என்கிற கார்த்திக் (வயது 21), சிங்கிலிகுளத்தை சேர்ந்த மற்றொரு இசக்கிபாண்டியன் மகன் பவித்ரன் (19), அதே ஊரை சேர்ந்த அங்கப்பன் மகன் மணிகண்டன், ஈரோடு கருங்கல்பாளையத்தை சேர்ந்த முரளி என்பவரின் மகன் குமரேசன் என்கிற குமார் ஆகியோரை கைது செய்தனர். அவர்களிடம் இருந்து ரூ.6 லட்சத்து 10 ஆயிரம், 2 பட்டாக்கத்தி, 2 மோட்டார் சைக்கிள்கள் பறிமுதல் செய்யப்பட்டன.
இதில் செந்தில்குமார் என்ற கார்த்திக் மீது சென்னை, நெல்லை, ஈரோடு, கோவை, சேலம் ஆகிய மாவட்டங்களில் வழிப்பறி வழக்குகள், கொலை வழக்குகள் என 33 வழக்குகள் உள்ளன. மணிகண்டன், பவித்ரன் ஆகியோர் மீது களக்காடு போலீசில் கொலை வழக்கு உள்ளது என போலீசார் தெரிவித்தனர். கைதானவர்கள் அனைவரையும் போலீசார் கோர்ட்டில் ஆஜர்படுத்தி சிறையில் அடைத்தனர். வழிப்பறி நடந்த 10 நாட்களில் அதில் தொடர்புடையவர்களை கைது செய்த போலீசாரை மாநகர போலீஸ் கமிஷனர் பாராட்டினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
