திண்டிவனம் திருவெண்ணெய்நல்லூரில் ஆன்லைன் மூலம் தேர்வுகள் நடத்தக்கோரி மாணவ மாணவிகள் போராட்டம்

திண்டிவனம்

திண்டிவனம்

தமிழகம் முழுவதும் கல்லூரி பருவ தேர்வுகள் நேரடியாக நடைபெறும், ஆன்லைன் மூலம் நடைபெறாது என உயர்கல்வித்துறை அறிவித்தது. இதற்கு மாணவ-மாணவிகள் எதிர்ப்பு தெரிவித்து போராட்டம் நடத்தி வருகின்றனர்.

அந்த வகையில் ஆன்லைன் மூலம் தேர்வுகளை நடத்தக்கோரி திண்டிவனம் கோவிந்தசாமி அரசு கலைக் கல்லூரி மாணவ-மாணவிகள் கல்லூரி முன்பு போராட்டத்தில் ஈடுபட்டனர். அப்போது அவர்கள் கோரிக்கைகளை வலியுறுத்தி கோஷம் எழுப்பினர். இதுபற்றிய தகவல் அறிந்து வந்த திண்டிவனம் போலீசார் மற்றும் அதிகாரிகள் போராட்டத்தில் ஈடுபட்ட மாணவ-மாணவிகளிடம் பேச்சுவார்த்தை நடத்தினார்கள். அப்போது தற்போது தகவல்கள் தான் வெளியாகி உள்ளது. இன்னும் முடிவு செய்யப்படவில்லை என தெரிவித்தனர். இதையடுத்து மாணவ-மாணவிகள் போராட்டத்தை கைவிட்டு அங்கிருந்து கலைந்து சென்றனர்.

சாலை மறியல்

அதேபோல் நேரடி தேர்வுக்கு எதிர்ப்பு தெரிவித்து திருவெண்ணெய்நல்லூர் அரசு கலை மற்றும் அறிவியல் கல்லூரி  மாணவ-மாணவிகள் திருவெண்ணெய்நல்லூர்-திருக்கோவிலூர் சாலையில் சின்னசெவலை பஸ் நிறுத்தம் முன்பு சாலைமறியல் போராட்டம் நடத்தினர். இதனால் அங்கு போக்கு  வரத்து பாதிக்கப்பட்டது.

இதுபற்றிய தகவல் அறிந்து வந்த திருவெண்ணெய்நல்லூர் போலீஸ் சப்-இன்ஸ்பெக்டர் குருபரன், பாலசிங்கம் மற்றும் போலீசார் மாணவ-மாணவிகளுடன் பேச்சுவார்த்தை நடத்தி இதுகுறித்து மேலதிகாரியிடம் பேசி உரிய நடவடிக்கை எடுப்பதாக கூறியதன் பேரில் போராட்டத்தை கைவிட்டு மாணவ-மாணவிகள் கலைந்து சென்றனர்.