தூத்துக்குடியில் லாரி திருடிய 2 வாலிபர்களை போலீசார் கைது செய்தனர்

தூத்துக்குடி போல்பேட்டையை சேர்ந்தவர் முருகன் (வயது 59). இவர் தனக்கு சொந்தமான லாரியை வீட்டின் பின்புறம் நிறுத்தி வைத்து இருந்தார். மறுநாள் பார்த்தபோது, அந்த லாரியை யாரோ மர்ம நபர்கள் திருடி சென்றது தெரியவந்தது. இதனால் அதிர்ச்சி அடைந்த முருகன் தூத்துக்குடி வடபாகம் போலீசில் புகார் அளித்தார். புகாரின் பேரில் வடபாகம் போலீஸ் சப்-இன்ஸ்பெக்டர் சிவராஜா வழக்குப்பதிவு செய்து விசாரணை நடத்தினார்.

விசாரணையில், தூத்துக்குடி ஜார்ஜ் ரோட்டை சேர்ந்த கடற்கரை மகன் ரமேஷ் (24) மற்றும் தூத்துக்குடி முத்துகிருஷ்ணாபுரத்தைச் சேர்ந்த செல்வராஜ் மகன் செல்வம் (28) ஆகியோர் சேர்ந்து லாரியை திருடியது கண்டுபிடிக்கப்பட்டது. உடனடியாக போலீசார் விரைந்து சென்று ரமேஷ், செல்வம் ஆகிய 2 பேரையும் கைது செய்தனர். தொடர்ந்து, லாரியையும் போலீசார் மீட்டனர்.