மின்னல் தாக்கி பெண் பலி

திருவெறும்பூர் ஒன்றியத்திற்கு உட்பட்ட திருநெடுங்குளம் ஊராட்சி பகுதியில் உள்ள ஒரு வயலில் நடவு பணிக்காக தஞ்சை மாவட்டம், ஒரத்தநாடு தாலுகா, வெட்டுக்காடு தெற்கு தெருவை சேர்ந்த 15 பெண்கள், 6 ஆண்கள் நேற்று வந்தனர். அவர்கள் நடவுப் பணியில் ஈடுபட்டபோது நேற்று மாலை சுமார் 4 மணியளவில் அப்பகுதியில் இடியுடன் கூடிய பலத்த மழை பெய்தது. இதில் மகாலிங்கத்தின் மனைவி அஞ்சம்மாள் (வயது 55) மீது மின்னல் தாக்கியதில், அவர் வயலிலேயே பரிதாபமாக உயிரிழந்தார்.

இதுகுறித்து தகவல் அறிந்த திருநெடுங்குளம் ஊராட்சி தலைவர் ஸ்ரீநிதி சதீஷ்குமார் மற்றும் திருவெறும்பூர் தாசில்தார் செல்வகணேஷ், துவாக்குடி போலீஸ் இன்ஸ்பெக்டர் ஞானவேலன் ஆகியோர் சம்பவ இடத்திற்கு வந்து அஞ்சம்மாள் உடலை மீட்டு பிரேத பரிசோதனைக்காக துவாக்குடி அரசு மருத்துவமனைக்கு அனுப்பி வைத்தனர். மேலும், இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.