பெரியகுளத்தில் மத்திய அரசை கண்டித்து காங்கிரஸ் கட்சியினர் ஆர்ப்பாட்டம் 40 பேர் கைது

பெரியகுளம்:

பெரியகுளம் மூன்றாந்தலில் காங்கிரஸ் கட்சி சார்பில் மத்திய அரசை கண்டித்து நேற்று ஆர்ப்பாட்டம் நடந்தது. இதற்கு தேனி மாவட்ட காங்கிரஸ் தலைவர் முருகேசன் தலைமை தாங்கினார். ஆர்ப்பாட்டத்தில் பெட்ரோல், டீசல், கியாஸ் சிலிண்டர் விலை உயர்வை குறைக்க வேண்டும் என்பது உள்பட 14 அம்ச கோரிக்கைகளை வலியுறுத்தி கோஷம் எழுப்பப்பட்டது. இதில் நகர காங்கிரஸ் தலைவர் ராமசுப்பிரமணி, துணைத்தலைவர் சம்சுதீன், வட்டார தலைவர் ஹம்சாமுகமது, செயற்குழு உறுப்பினர் ஸ்ரீதர் உள்பட பலர் கலந்து கொண்டனர். பின்னர் அவர்கள் நகருக்குள் ஊர்வலமாக செல்ல முயன்றனர். இதற்கு பெரியகுளம் தென்கரை போலீசார் அனுமதி அளிக்கவில்லை. இதைத்தொடர்ந்து காங்கிரசார் 40 பேரை போலீசார் கைது செய்தனர்.