ஆடு திருட்டில் ஈடுபட்ட 4 பேர் கைது

திருச்சி, நவ.30-
திருச்சி நவல்பட்டு போலீஸ் சிறப்பு சப்-இன்ஸ்பெக்டராக பணியாற்றி வந்தவர் பூமிநாதன். இவர் சில நாட்களுக்கு முன்பு ஆடு திருடர்களால் வெட்டி படுகொலை செய்யப்பட்டார். இந்த கொலை வழக்கு தொடர்பாக 3 பேரை போலீசார் கைது செய்தனர்.
 இந்தநிலையில் திருச்சி மத்திய மண்டல போலீஸ் ஐ.ஜி.பாலகிருஷ்ணன் உத்தரவின்பேரில், திருச்சி சரக டி.ஐ.ஜி.சரவணசுந்தர் மேற்பார்வையில் கடந்த 23-ந் தேதி ஆடு திருடும் நபர்களை பிடிப்பதற்காக ஒரு சப்-இன்ஸ்பெக்டர் தலைமையில், 3 போலீசார் உள்ளடக்கிய தனிப்படை திருச்சி சரக அளவில் அமைக்கப்பட்டது. மேலும் அனைத்து மாவட்டங்களிலும் ஆடு திருடும் கும்பல் மீது நடவடிக்கை எடுக்க அறிவுறுத்தப்பட்டது.
கடந்த 23-ந் தேதி முதல் 28-ந் தேதி வரை 6 நாட்களில் திருச்சி சரகத்துக்குட்பட்ட திருச்சி, புதுக்கோட்டை, கரூர் ஆகிய மாவட்டங்களில் ஆடு திருட்டு சம்பந்தமாக மொத்தம் 12 வழக்குகள் (திருச்சி-3, புதுக்கோட்டை-8, கரூர்-1) பதிவு செய்யப்பட்டன.
இந்த சம்பவத்தில் 4 பேர் கைது செய்யப்பட்டு அவர்களிடம் இருந்து ரூ.3 லட்சம் மதிப்புள்ள 60 ஆடுகள் மீட்கப்பட்டு கோர்ட்டு மூலம் உரியவர்களிடம் ஒப்படைக்கப்பட்டுள்ளது.