‘தினத்தந்தி‘ புகார் பெட்டி: மக்கள் குறைகள் தொடர்பான பதிவுகள்

செங்கல்பட்டு மாவட்டம் பொழிச்சலூரில் மின்கம்பம் கயிறு மூலம் கட்டி மிகவும் மோசமான நிலையில் இருப்பது குறித்து ‘தினத்தந்தி’ புகார் பெட்டியில் செய்தி வெளியானது. இதுகுறித்து மின்வாரியம் சார்பில் வெளியிடப்பட்ட விளக்கத்தில், ‘பாலாற்றில் ஏற்பட்ட வெள்ள பெருக்கினால் பொழிச்சலூரை சுற்றியுள்ள வட புதுப்பட்டு, பச்சக்குப்பம் மற்றும் முருங்கை கிராமங்களுக்கு மின்சாரத்தை எடுத்து செல்லும் மின்கம்பங்கள் ஆற்றின் வெள்ளத்தில் அடித்து செல்லப்பட்டன. எனவே பாலாற்றின் குறுக்கே இல்லாமல் மற்றொரு வழியில் இந்த கிராமங்களுக்கு மின்சாரம் வழங்க நடவடிக்கை எடுக்கப்பட்டுள்ளது’ என்று கூறப்பட்டுள்ளது. மேலும் மழைவெள்ளத்துக்கு இடையிலேயும் புதிய மின்கம்பங்களை பொருத்தும் நடவடிக்கையில் மின்வாரிய ஊழியர்கள் மும்முரமாக ஈடுபட்டு வருகின்றனர்.

சென்னை நேரு பார்க் குடிசை மாற்று வாரிய குடியிருப்புக்கு அருகில் உள்ள கழிவுநீர் அகற்றும் மோட்டார் அறை அருகில் குப்பைகள் அதிகம் தேங்கி உள்ளது. இதனால் இந்த வழியாக நடந்து செல்ல மிகவும் சிரமமாக உள்ளது. எனவே குவிந்துள்ள குப்பைக்கழிவுகளை அகற்றிட வேண்டும்

- பொதுமக்கள், நேரு பார்க்.

சென்னை நுங்கம்பாக்கம் லயோலா கல்லூரி அருகே உள்ள பஸ் நிறுத்தத்தில் இருக்கைகள் சேதம் அடைந்துள்ளன. இதனால் வயதான பயணிகள் கால்கடுக்க நிற்க வேண்டி இருக்கிறது. எனவே இந்த பஸ் நிறுத்தத்தை சீரமைத்து தர வேண்டும்.

- பயணிகள்.

சென்னை புழல் சிறைச்சாலை சிக்னல் அருகே சாலை மிகவும் மோசமாக இருக்கிறது. பள்ளி வாகனங்கள் அதிகம் செல்லும் பகுதி ஆகும். இந்த சாலை சென்னை-கொல்கத்தா நெடுஞ்சாலை என்பதால் கனரக வாகனங்களும் அதிகம் செல்கின்றன. அசம்பாவித சம்பவம் நேரிடும் முன்பு இந்த சாலையை நெடுஞ்சாலைத்துறை அதிகாரிகள் செப்பனிட்டு சீரமைத்து தர வேண்டும். மேலும் இந்த சாலையில் எங்கெங்கு சேதம் அடைந்துள்ளது என்பதை கள ஆய்வு செய்து உரிய நடவடிக்கை எடுக்க வேண்டும்.

- வாகன ஓட்டிகள்.

சென்னை கொடுங்கையூர் கோவிந்தசாமி நகர் தர்மலிங்கம் தெருவில் மழைநீர் இன்னும் வடியாமல் உள்ளது. இதனால் கொசுக்கள் அதிகம் உற்பத்தியாகி வருகின்றன. எனவே இப்பகுதியில் தேங்கிய மழைநீரை மோட்டார் பம்புகளை பயன்படுத்தி வெளியேற்ற நடவடிக்கை எடுக்க வேண்டும்.

- சுந்தர் சிங், கொடுங்கையூர்.

சென்னை அண்ணாநகர் கிழக்கு ‘எல்’ பிளாக்கில் உள்ள மாநகராட்சி பூங்கா (முக்கோண பூங்கா) கொரோனா கால ஊரடங்கின்போது மூடப்பட்டது. ஆனால் கட்டுப்பாடுகள் விலக்கப்பட்டு பல மாதங்கள் ஆகியும் பூங்கா இன்று வரை திறக்கப்படவில்லை. இப்போது பெய்து வரும் கனமழையால் இந்த பூங்கா முழுவதும் நீர் தேங்கி நிற்கிறது. குப்பை கழிவுகளும் சேர்ந்து துர்நாற்றம் வீசுகிறது. எனவே இந்த பூங்காவை பராமரித்து சுத்தம் செய்து மீண்டும் பயன்பாட்டுக்கு கொண்டு வர மாநகராட்சி நடவடிக்கை எடுக்க வேண்டும்.

- பொதுமக்கள், அண்ணாநகர் கிழக்கு.

சென்னை புளியந்தோப்பு டிகாஸ்டர் ரோட்டில் மின் இணைப்பு பெட்டி ஒன்று உள்ளது. தேங்கியிருக்கும் மழைநீரில் மின் இணைப்பு பெட்டியின் வயர்கள் செல்கிறது. ஆங்காங்கே மின் விபத்துகள் நிகழ்ந்து வரும் வேளையில் இந்த மின் இணைப்பு பெட்டி அச்சுறுத்தும் வகையில் இருக்கிறது. எனவே மின்வாரிய அதிகாரிகள் கள ஆய்வு செய்து உரிய நடவடிக்கை எடுக்க வேண்டும்.

- பொதுமக்கள், புளியந்தோப்பு.