குடியிருப்பு பகுதியில் தேங்கும் கழிவுநீர்; தோகைமலை-பாளையம் சாலையில் பொதுமக்கள் மறியல்

தோகைமலை அருகே உள்ள கம்பத்தான்பாறை ரோட்டில் இருந்து செல்லும் கழிவுநீர் காலனி வழியாக நாகனூர் பகவதி அம்மன் கோவில், காளியம்மன் கோவில் மற்றும் குடியிருப்பு பகுதிகளில் தேங்கி வருகிறது. இதனால் அப்பகுதி மக்கள் சிரமம் அடைந்து வருகிறார்கள். 

இதையடுத்து, இப்பகுதியில் சாக்கடை வசதி ஏற்படுத்தி தரக்கோரி கடந்த 1-ந் தேதி வார்டு உறுப்பினர்கள் உண்ணாவிரத போராட்டத்தில் ஈடுபட்டனர். இதுகுறித்து தகவல் அறிந்த அதிகாரிகள் வார்டு உறுப்பினர்களிடம் பேச்சுவார்த்தையில் ஈடுபட்டனர். இதில், உடன்பாடு ஏற்பட்டதால் உண்ணாவிரதம் கைவிடப்பட்டது.

இந்தநிலையில் அதிகாரிகள் உறுதியளித்தபடி எந்தவித நடவடிக்கையும் எடுக்காததால் அதிருப்தி அடைந்த அப்பகுதி மக்கள் தோகைமலை-பாளையம் சாலையில் நேற்று காலை மறியலில் ஈடுபட்டனர். இதனால் அந்த வழியாக வாகனங்கள் செல்ல முடியாத நிலை ஏற்பட்டது.

இதுகுறித்து தகவல் அறிந்த தோகைமலை துணை வட்டார வளர்ச்சி அலுவலர் ரவி, ஒன்றிய அதிகாரிகள் மற்றும் தோகைமலை இன்ஸ்பெக்டர் ராஜ்குமார், சப்-இன்ஸ்பெக்டர் திருப்பதி ஆகியோர் பேச்சுவார்த்தை நடத்தினார்கள். இதில் சமாதானம் அடையாத பொதுமக்கள் தொடர்ந்து மறியலில் ஈடுபட்டனர். 

இதையடுத்து, குளித்தலை ஆர்.டி.ஓ. புஷ்பாதேவி, போலீஸ் துணை சூப்பிரண்டு ஸ்ரீதர் ஆகியோர் சம்பவ இடத்திற்கு விரைந்து சென்று பொதுமக்களுடன் பேச்சுவார்த்தை நடத்தினர். இதில் காலனி வழியாக தோகைமலை மெயின் ரோட்டில் தற்காலிகமாக கால்வாய் வெட்டி கழிவுநீர் கொண்டு செல்ல நடவடிக்கை எடுப்பதாக அதிகாரிகள் தெரிவித்தனர். ஆனால் அதற்கு காலனி மக்கள் எதிர்ப்பு தெரிவித்தனர். மேலும், இப்பகுதியில் சாக்கடை அமைத்து கழிவுநீர் வெளியேற்ற வேண்டும் என கூறினர்.

இதனைதொடர்ந்து கழிவு நீர் கொண்டு செல்வது தொடர்பாக குளித்தலை ஆர்.டி.ஓ. அலுவலகத்தில் நாகனூர் மற்றும் காலனி மக்கள் இடையே அமைதி பேச்சுவார்த்தை நடத்த முடிவு செய்யப்பட்டது. இதில் சமாதானம் அடைந்த பொதுமக்கள் தங்களுடைய போராட்டத்தை கைவிட்டனர். இந்த சம்பவம் காரணமாக அப்பகுதியில் 3 மணி நேரம் போக்குவரத்து பாதிக்கப்பட்டது.