மாணவிகளுக்கு பாலியல் தொல்லை விவகாரம்; கல்லூரி தாளாளருக்கு மருத்துவ பரிசோதனை

திண்டுக்கல்:

மாணவிகளுக்கு பாலியல் தொல்லை கொடுத்த வழக்கில் சிக்கிய கல்லூரி தாளாளர் ஜோதிமுருகனுக்கு, மருத்துவ பரிசோதனை செய்யப்பட்டது.

திண்டுக்கல் அருகே உள்ள முத்தனம்பட்டியில் தனியார் நர்சிங், கேட்டரிங் கல்லூரி செயல்படுகிறது. இந்த கல்லூரியில் தென்மாவட்டங்களை சேர்ந்த ஏராளமான மாணவ-மாணவிகள் பயின்று வருகின்றனர். இதற்காக பல மாணவ-மாணவிகள் கல்லூரி விடுதியில் தங்கி இருக்கின்றனர். இந்த நிலையில் கல்லூரி தாளாளர் ஜோதிமுருகன், பாலியல் தொல்லை கொடுத்ததாக கூறி 3 மாணவிகள் தாடிக்கொம்பு போலீஸ் நிலையத்தில் புகார் அளித்தனர். மாணவ-மாணவிகள் போராட்டத்திலும் ஈடுபட்டனர். இதையடுத்து 3 மாணவிகள் கொடுத்த புகாரின் பேரில் தாடிக்கொம்பு போலீசார் வழக்குப்பதிவு செய்து கல்லூரி விடுதி வார்டன் அர்ச்சனாவை கைது செய்தனர். ஆனால் கல்லூரி தாளாளர் ஜோதிமுருகன் தலைமறைவாகி விட்டார். பின்னர் அவர் திருவண்ணாமலை போளூர் கோர்ட்டில் சரண் அடைந்தார்.

இதைத் தொடர்ந்து அவரை போலீசார் 3 நாட்கள் காவலில் எடுத்து விசாரணை நடத்தினர். அதன்பின்னர் அவரை கோர்ட்டில் ஆஜர்படுத்தி பழனி சிறையில் அடைத்தனர். இதற்கிடையே பழனி சிறையில் இருக்கும் ஜோதிமுருகனை நேற்று போலீசார் திண்டுக்கல் அரசு மருத்துவமனைக்கு அழைத்து வந்தனர். அங்கு அவருக்கு மருத்துவ பரிசோதனை செய்யப்பட்டது. இதையடுத்து அவரை போலீசார் அழைத்து சென்று மீண்டும் பழனி சிறையில் அடைத்தனர்.