மோட்டார் சைக்கிளில் இருந்து தவறி விழுந்த வாலிபர் சாவு

சேலம் மாவட்டம் செங்கனூர் கொல்லப்பட்டி பகுதியை சேர்ந்தவர் காளிமுத்து. இவரது மகன் சேட்டு (வயது 25). இவர் கரூர் மாவட்டம் புன்னம் சத்திரம் பகுதியில் உள்ள ஜல்லி கிரஷரில் வேலை பார்த்து வந்தார். இந்தநிலையில் கடந்த சில நாட்களுக்கு முன்பு ஈரோடு-கரூர் சாலையில் மோட்டார் சைக்கிளில் சேட்டு சென்று கொண்டிருந்தார். அப்போது நிலைத்தடுமாறி மோட்டார் சைக்கிளுடன் அவர் கீழே விழுந்தார். இதில் தலையில் பலத்த காயம் அடைந்த அவரை அந்த வழியாக சென்றவர்கள் மீட்டு கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். பின்னர் மேல் சிகிச்சைக்காக சேலம் அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு அவருக்கு டாக்டர்கள் தீவிர சிகிச்சை அளித்தனர். இந்தநிலையில் சிகிச்சை பலனின்றி சேட்டு நேற்று பரிதாபமாக இறந்தார். இந்த சம்பவம் குறித்து வேலாயுதம்பாளையம் சப்-இன்ஸ்பெக்டர் நெப்போலியன் வழக்குப்பதிவு செய்து விசாரணை நடத்தி வருகிறார்.