மதுரை-மானாமதுரை இடையே மின்சார ரெயில் சோதனை ஓட்டம்

மதுரை-மானாமதுரை இடையான புதிய மின்மயமாக்கப்பட்ட ரெயில் பாதையை தென் சரக ரெயில்வே பாதுகாப்பு ஆணையர் அபய்குமார் ராய் நேற்று ஆய்வு செய்தார். இதற்கான சிறப்பு ஆய்வு ரெயில் மதுரையில் இருந்து காலை 9.30 மணிக்கு புறப்பட்டது. முதலில் திடீர் நகர் மற்றும் தெற்கு வாசல் அருகே உள்ள ரெயில்வே பாலங்களில் ரெயில்வே மின்வழி பாதை ஆய்வு செய்யப்பட்டது. பின்னர் அனுப்பானடி ரெயில்வே கேட்டை ஆய்வு செய்தார்.
ஆய்வு சிறப்பு ரெயில் மானாமதுரைக்கு மதியம் 1 மணியளவில் சென்றடைந்தது. வழிநெடுகிலும் பொதுமக்கள், பயணிகள் பயன்பாட்டு பகுதிகளில் "25 ஆயிரம் கிலோ வாட் மின்சாரம் பாயும் மின் வழித்தடங்களை நெருங்க வேண்டாம்" என எச்சரிக்கை விளம்பரங்கள் உள்ளதா? என சோதனை செய்யப்பட்டது.
மேலும், மானாமதுரை ரெயில் நிலையத்தில் நடைமேடை, ரெயில்பாதை நடைமேம்பாலம் ஆகியவற்றையும் ஆய்வு செய்தார். பின்பு ரெயில் வேக சோதனை ஓட்டம் நடைபெற்றது. மானாமதுரையில் மதியம் 2.50 மணிக்கு புறப்பட்ட சிறப்பு ஆய்வு ரெயில் 100 கி.மீ. வேகத்தில் பயணித்து மாலை 3.27 மணிக்கு 37 நிமிடங்களில் மதுரை வந்து சேர்ந்தது.
இந்த ஆய்வின் போது, முதன்மை மின்வழி திட்ட இயக்குனர் சமீர் டிஹே, கூடுதல் கோட்ட ரெயில்வே மேலாளர் தண்ணீரு ரமேஷ் பாபு, முதுநிலை கோட்ட மின்மயமாக்கல் பொறியாளர் பச்சு ரமேஷ், கோட்ட பாதுகாப்பு அதிகாரி மனோகரன் உள்ளிட்டோர் கலந்து கொண்டனர்.