சேலம் சீலநாயக்கன்பட்டியில் மேள கலைஞர் விபத்தில் பலி

அன்னதானப்பட்டி:

சேலம் சீலநாயக்கன்பட்டி சின்னையன் காலனி பகுதியை சேர்ந்தவர் கந்தசாமி. இவருடைய மகன் விஜய் என்ற விஜயராகவன் (வயது 27). மேள கலைஞர். இந்த நிலையில் விஜயராகவன் கடந்த 5-ந் தேதி வேலை விஷயமாக தனது வீட்டின் அருகே இருந்து, அந்த வழியாக வந்த ஒரு மோட்டார் சைக்கிளில் லிப்ட் கேட்டு ஏறி சீலநாயக்கன்பட்டி தனியார் காபி பார் அருகில் சென்றார். அப்போது அவர் குடிபோதையில் இருந்ததாக கூறப்படுகிறது. இதில் எதிர்பாராதவிதமாக விஜயராகவன் மோட்டார் சைக்கிளில் இருந்து நிலைதடுமாறி தவறி கீழே விழுந்து படுகாயம் அடைந்தார். உடனே அருகில் இருந்தவர்கள் அவரை மீட்டு சேலம் அரசு ஆஸ்பத்திரியில்  சிகிச்சைக்காக சேர்த்தனர். இதனிடையே மோட்டார் சைக்கிளில் வந்தவர் அங்கிருந்து தப்பி ஓடி விட்டார். இந்த நிலையில் சேலம் அரசு ஆஸ்பத்திரியில் சிகிச்சை பெற்று வந்த விஜயராகவன் நேற்று அதிகாலை சிகிச்சை பலனின்றி பரிதாபமாக உயிரிழந்தார். இந்த விபத்து குறித்து விஜயராகவனின் மனைவி கவுசல்யா கொடுத்த புகாரின் பேரில் அன்னதானப்பட்டி போலீசார் வழக்குப்பதிவு செய்து விசாரித்து வருகின்றனர்.