‘தினத்தந்தி‘ புகார் பெட்டி: மக்கள் குறைகள் தொடர்பான பதிவுகள்

சென்னை கொளத்தூர் சிலந்திக்குட்டை மோகனம் தெருவில் உள்ள மின் இணைப்பு பெட்டியில் ஆபத்தான வகையில் மின்சார வயர்கள் வெளியே நீட்டிக் கொண்டிருப்பது பற்றி ‘தினத்தந்தி’ புகார் பெட்டியில் படத்துடன் செய்தி வெளியானது.

இதையடுத்து மின்சார வயர்கள் மின்சார பெட்டிக்குள் பாதுகாப்பாக வைக்கப்பட்டுள்ளது. மின்சார வாரியத்தின் விறுவிறுப்பு நடவடிக்கைக்கும், ‘தினத்தந்தி’க்கும் அப்பகுதி மக்கள் பாராட்டு தெரிவித்துள்ளனர்.

சென்னை புழல் லட்சுமி அம்மன் கோவில் மெயின் தெருவில் உள்ள மின்விளக்கு கம்பத்தின் அடிப்பகுதி துருப்பிடித்து மிகவும் ஆபத்தான நிலையில் இருப்பது குறித்து ‘தினத்தந்தி’ புகார் பெட்டியில் படத்துடன் சுட்டிக்காட்டப்பட்டது. இதையடுத்து உடனடியாக அந்த மின்விளக்கு கம்பம் மாற்றப்பட்டுள்ளது.

சென்னை அயப்பாக்கம் ஐ.சி.காலனி மின்சார அலுவலகம் பின்புறம் உள்ள ஜீவரத்தினம் தெருவில் கழிவுநீர் தெப்பம் போன்று தேங்கி உள்ளது. வீடுகளுக்கு உள்ளேயும் வந்து விடுகிறது. இதனால் சொல்லொணத் துயரத்தை அன்றாடம் அனுபவித்து வருகிறோம். எங்களுடைய இன்னல்களை உணர்ந்து சம்பந்தப்பட்ட அதிகாரிகள் உரிய நடவடிக்கை எடுக்க வேண்டும்.

-எஸ்.முத்தமிழ்செல்வி, அயப்பாக்கம்.

சென்னை திருவான்மியூர் இந்திரா நகர் 29-வது குறுக்கு தெருவில் உள்ள மின் இணைப்பு பெட்டி திறந்த நிலையில் இருக்கிறது. மேலும் மின்வயர்கள் முறையற்ற வகையில் செல்கிறது. இதன் காரணமாக மின் விபத்துகள் நேரிட்டு விடுமோ? என்ற தயக்கம் இருக்கிறது. எனவே மின்வாரிய அதிகாரிகள் கள ஆய்வு செய்து உரிய நடவடிக்கை எடுக்க வேண்டும்.

- விஜய், இந்திரா நகர்.

சென்னை எருக்கஞ்சேரி அம்பேத்கர் சாலை அம்பேத்கர் தெருவில் உள்ள மின் இணைப்பு பெட்டியில் இருந்து ராட்சத மின்வயர்கள் சாலையை ஆக்கிரமித்து செல்கிறது. இந்த மின்வயர் காலில் சிக்கினால் கீழே தடுமாறி விழும் நிலை இருக்கிறது. எனவே மின்வாரியம் உடனடியாக நடவடிக்கை எடுக்க வேண்டும்.

-சமூக ஆர்வலர்.

சென்னை வானகரம் பழைய மீன் மார்க்கெட் சாலை செட்டியார் அகரம் சாலை கவரை தெருவில் குப்பைத் தொட்டியில் இருந்து முறையாக குப்பை கழிவுகள் அகற்றப்படுவது இல்லை. குப்பை தொட்டி நிரம்பி வழிவதால் பொதுமக்கள் சாலையிலேயே குப்பைகளை கொட்டி செல்கிறார்கள். இரை தேடி வரும் கால்நடைகள் குப்பைகளை தூர்வாருகின்றன. இதனால் இந்த சாலை மிகுந்த சுகாதார சீர்கேடுடன் காட்சி அளிக்கிறது.

- பொதுமக்கள்.

சென்னை பட்டாளம் மணிகூண்டு ஸ்ட்ரான்ஸ் சாலை முதல் தெருவில் ரேஷன் கடை இயங்கி வருகிறது. இந்த கடையின் முன்பு சேறும், சகதியும் சூழ்ந்துள்ளது. இதனால் ரேஷன் பொருட்கள் வாங்க வரும் ஏழை-எளிய மக்கள் மிகுந்த சிரமம் அடைகின்றனர். சேற்றில் வழுக்கி சிலர் கீழே விழுந்துள்ளனர். எனவே அதிகாரிகள் உடனடியாக நடவடிக்கை எடுக்க வேண்டும் என்று வேண்டுகோள் விடுக்கிறோம்.

- சையது கஷிம், பட்டாளம்.

சென்னை அம்பத்தூர் பானுநகர் 16-வது அவென்யூவில் உள்ள மின்கம்பத்தின் அடிபகுதி சேதம் அடைந்து காணப்படுகிறது. சிமெண்ட் பூச்சுகள் பெயர்ந்து கான்கிரீட் கம்பிகள் மட்டும் தெரிகின்றன. எனவே இந்த மின்கம்பத்தின் உறுதித்தன்மையை ஆராய்ந்து மின்வாரிய அதிகாரிகள் நடவடிக்கை எடுக்க வேண்டும்.

-காமராஜ், அம்பத்தூர்.