துண்டால் கழுத்தை இறுக்கி மனைவி கொலை

மதுரை

துண்டால் கழுத்தை இறுக்கி மனைவியை கொலை செய்த ஆட்டோ டிரைவர் கைது செய்யப்பட்டார்.

கழுத்தை நெரித்து கொலை

மதுரை கீரைத்துறை பகுதியை சேர்ந்தவர் மூர்த்தி(வயது 38). ஆட்டோ டிரைவர். இவருடைய மனைவி முனீசுவரி(33), இவர்களுக்கு 2 பெண் குழந்தைகளும், ஒரு ஆண் குழந்தையும் உள்ளனர். 

முனீசுவரி தனியார் மருத்துவமனையில் வேலை பார்த்து வந்தார். கடந்த சில நாட்களாக கணவன்-மனைவி இடையே அடிக்கடி தகராறு ஏற்பட்டு வந்தது. இந்தநிலையில் நேற்று காலையும் அவர்கள் இடையே மீண்டும் தகராறு ஏற்பட்டது. அப்போது திடீரென்று  துண்டால் முனீசுவரி கழுத்தை மூர்த்தி இறுக்கியதாக தெரியவருகிறது. சிறிது நேரத்தில் முனீசுவரி மயங்கி விழுந்து சம்பவ இடத்திலேயே பரிதாபமாக இறந்தார். மனைவி இறந்ததை அறிந்த மூர்த்தி அங்கிருந்து தப்பி ஓடிவிட்டார்.

ஆட்டோ டிரைவர் கைது

இது குறித்து தகவல் அறிந்து கீரைத்துறை போலீசார் சம்பவ இடத்திற்கு விரைந்து வந்தனர். அவர்கள் முனீசுவரி உடலை கைப்பற்றி பிரேத பரிசோதனைக்காக மதுரை அரசு ஆஸ்பத்திரிக்கு அனுப்பி வைத்தனர். மேலும் வழக்குப்பதிவு செய்து விசாரணை நடத்தி, அந்த பகுதியில் பதுங்கி இருந்த மூர்த்தியை கைது செய்தனர்.

இதுகுறித்து போலீசார் கூறும் போது, “நடத்தையில் சந்தேகப்பட்டு கணவன்-மனைவி இடையே தகராறு ஏற்பட்டு வந்துள்ளது. அதனால்தான் இந்த கொலை நடந்து இருக்கலாம்” என்று தெரிவித்தனர்.