10 ரூபாய் நோட்டுகளை சிதறவிட்டு முதியவரிடம் ரூ.2 லட்சம் பறிப்பு

விருத்தாசலம், 

விருத்தாசலம் தெற்கு பெரியார் நகர் குறிஞ்சி நகரை சேர்ந்தவர் உதயசூரியன்(வயது 64). இவர் நேற்று முன்தினம் தனது வங்கி கணக்கில் இருந்து ரூ.2 லட்சத்தை எடுத்துக்கொண்டு வீட்டுக்கு புறப்பட்டார். திரு.வி.க. நகரில் நடந்து சென்றபோது மோட்டார் சைக்கிளில் வந்த 2 பேர், உதயசூரியனின் பின்னால் 10 ரூபாய் நோட்டுகளை சிதற விட்டனர். பின்னர் அவர்கள், உதயசூரியனிடம் தங்களது பணம் கீழே கிடப்பதாக கூறினர். உடனே அவரும் குனிந்து, 10 ரூபாய் நோட்டுகளை எடுத்தார். அந்த சமயத்தில் 2 பேரும் உதயசூரியனிடம் இருந்து ரூ.2 லட்சத்தை பறித்துக் கொண்டு   மோட்டார் சைக்கிளில் மின்னல் வேகத்தில் சென்று விட்டனர். இதனால் அதிர்ச்சி அடைந்த அவர், கொடுத்த புகாரின் பேரில் விருத்தாசலம் போலீசார் வழக்குப்பதிவு செய்து 2 மர்மநபர்களை வலைவீசி தேடி வருகின்றனர்.