வீட்டு கதவை உடைத்து ரூ.3 லட்சம் திருட்டு

நாகர்கோவில்:

நாகர்கோவிலில் வீட்டின் கதவை உடைத்து ரூ.3 லட்சத்தை திருடி சென்ற மர்மநபர்களை போலீசார் தேடிவருகின்றனர்.

இந்த துணிகர சம்பவம் குறித்து போலீஸ் தரப்பில் கூறப்பட்டதாவது:-

நாகர்கோவில் பார்வதிபுரம் பொன்நகரை சேர்ந்தவர் வில்லியம் (வயது 71). இவர் நேற்று முன்தினம் இரவு வீீட்டை பூட்டி விட்டு அருகே உள்ள ஆலயத்துக்கு சென்றார். அங்கு நடைபெற்ற புத்தாண்டு சிறப்பு பிராா்த்தனையில் கலந்து கொண்டார். பின்னர் அவர் வீடு திரும்பினார். அப்போது வீட்டை திறந்து உள்ளே சென்று பார்த்த போது அதிர்ச்சி அடைந்தார். அங்கு வீட்டின் பின்பக்க கதவு உடைக்கப்பட்டிருந்தது.

மேலும் வீட்டில் உள்ள ஒரு அறையில் வைக்கப்பட்டிருந்த பீரோ உடைக்கப்பட்டு பொருட்கள் மற்றும் துணிகள் சிதறி கிடந்தன.  பீரோவில் இருந்த ரூ.3 லட்சம் மற்றும் 1 பவுன் நகையும் திருடு போய் இருந்தது. இரவில் வீட்டில் ஆள் இல்லாதை நோட்டமிட்ட மர்மநபர்கள், வீட்டின் பின்பக்க கதவை உடைத்து கைவரிசை காட்டியது தெரியவந்தது.

மேலும் இதுபற்றி வில்லியம் நேசமணி நகர் போலீசாருக்கு தகவல் தெரிவித்தார். உடனே சம்பவ இடத்துக்கு விரைந்து வந்த போலீசார், மர்மநபர்கள் ஏதேனும் தடயங்களை விட்டு சென்றுள்ளார்களா என ஆய்வு செய்தனர். பின்னர் தடயவியல் நிபுணர்கள் வரவழைக்கப்பட்டு அங்கு பதிவான கைரேகைகளை பதிவு செய்தனர்.

பின்னர் அந்த பகுதியில் கண்காணிப்பு கேமராவில் பதிவான காட்சியை கைப்பற்றி போலீசார் விசாரணை நடத்தி வருகின்றனர்.