நாமக்கல் பஸ் நிலையத்தில் அலைமோதிய பொதுமக்கள் கூட்டம்

நாமக்கல்:

தமிழகம் முழுவதும் பள்ளிகளுக்கு கடந்த மாதம் 25-ந் தேதி முதல் நேற்று வரை அரையாண்டு விடுமுறை அளிக்கப்பட்டு இருந்தது. இதனால் பள்ளி, கல்லூரிகளில் படிக்கும் மாணவ, மாணவிகள் மற்றும் ஆசிரியர்கள் அவரவர் சொந்த ஊருக்கு சென்று விட்டனர். இதேபோல் அரசு ஊழியர்களும் கிறிஸ்துமஸ் மற்றும் புத்தாண்டு விடுமுறையையொட்டி சொந்த கிராமங்களுக்கு சென்று விட்டனர்.

பள்ளிகளை பொறுத்த வரையில் இன்று (திங்கட்கிழமை) 9-ம் வகுப்பு முதல் பிளஸ்-2 வரை மீண்டும் செயல்பட உள்ளது. எனவே பள்ளி, கல்லூரி மாணவர்கள் மற்றும் ஆசிரியர்கள் நேற்று சொந்த கிராமங்களில் இருந்து தங்களது கல்வி நிறுவனங்களுக்கு திரும்பினர். இதேபோல் வேலைக்கு செல்வோரும் அலுவலகத்துக்கு திரும்பினர். இதனால் பஸ் நிலையங்களில் பொதுமக்கள் கூட்டம் அலைமோதியது. நாமக்கல் பஸ் நிலையத்திலும் வழக்கத்தை காட்டிலும் பொதுமக்கள் கூட்டம் அதிகமாக இருந்தது. ஆனால் பஸ்கள் குறைவான அளவில் இயக்கப்பட்டதாக பயணிகள் குற்றம்சாட்டினர்.