லாரி உரிமையாளர் கொலை

திருச்சி மாவட்டம், மண்ணச்சநல்லூர் காந்தி நகர் 7-வது குறுக்குத் தெருவைச் சேர்ந்தவர் ராஜமாணிக்கம். இவரது மகன் சதீஷ்குமார்(வயது 32). இவர் சொந்தமாக லாரி வைத்து ஓட்டி வந்தார். நேற்று காலை இவரும், இவருடைய நண்பர்கள் 4 பேரும் மண்ணச்சநல்லூர் அருகே உள்ள ஈச்சம்பட்டி ஏரிப்பகுதியில் அமர்ந்து மது அருந்தியதாகவும், அப்போது நண்பர்களுக்கும், சதீஷ்குமாருக்கும் இடையே வாக்குவாதம் ஏற்பட்டதாகவும் கூறப்படுகிறது.

அப்போது ஆத்திரத்தில் அவரது நண்பர்கள் 4 பேரும் சேர்ந்து சதீஷ்குமாரை இரும்பு கம்பியால் அடித்து கொலை செய்தனர். மேலும், அவருடைய கை, கால்களை கட்டி அந்த பகுதியில் உள்ள வரட்டு ஏரியில் வீசி விட்டு தப்பிச் சென்றனர்.

இதுகுறித்து தகவல் அறிந்த திருச்சி மாவட்ட போலீஸ் சூப்பிரண்டு சுஜீத்குமார், ஜீயபுரம் உட்கோட்ட துணை போலீஸ் சூப்பிரண்டு செந்தில்குமார், மண்ணச்சநல்லூர் போலீஸ் இன்ஸ்பெக்டர் ரமேஷ்குமார் ஆகியோர் சம்பவ இடத்திற்கு சென்று விசாரணை நடத்தினர். பின்னர் சதீஷ்குமாரின் உடலை ஏரியில் இருந்து மீட்டு பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர். 

 இதுதொடர்பாக மண்ணச்சநல்லூர் போலீசார் வழக்குப்பதிவு செய்து பணப் பிரச்சினை காரணமாக இந்த கொலை நடந்ததா?, கள்ளக்காதல் பிரச்சினையா? அல்லது வேறு ஏதேனும் காரணமா? என்பன உள்பட  பல்வேறு கோணங்களில் விசாரணை நடத்தி வருகின்றனர். மேலும், தப்பி ஓடிய சதீஷ்குமாரின் நண்பர்களை போலீசார் வலைவீசி தேடி வருகின்றனர். கொலை செய்யப்பட்ட சதீஷ்குமாருக்கு திருமணமாகி லட்சுமி (27) என்ற மனைவியும், ஒரு குழந்தையும் உள்ளனர் என்பது குறிப்பிடத்தக்கது.