சென்னை விமான நிலையத்தில் 1 கிலோ தங்கம் பறிமுதல்

ஆலந்தூர்,

சென்னை மீனம்பாக்கம் பன்னாட்டு விமான நிலையத்துக்கு துபாயில் இருந்து விமானம் வந்தது. அதில் வந்த பயணிகளை விமான நிலைய சுங்க இலாகா கமிஷனர் உதய்பாஸ்கர் தலைமையிலான அதிகாரிகள் தீவிரமாக கண்காணித்தனர். அப்போது 2 பேரை சந்தேகத்தின்பேரில் நிறுத்தி விசாரித்தனர். அதிகாரிகளிடம் இருவரும் முன்னுக்குபின் முரணாக பேசியதால் அவர்களது உடைமைகளை சோதனை செய்தனர்.

1 கிலோ தங்கம்

அதில் சிறிய அளவிலான 2 மின்சாதன கருவிகள் இருந்தது. வழக்கத்துக்கு மாறாக அவை கனமாக இருந்ததால் சந்தேகம் அடைந்த சுங்க இலாகா அதிகாரிகள், அவற்றை பிரித்து பார்த்தனர்.

அதில் தங்கத்தை மறைத்து வைத்து கடத்தி வந்தது தெரிந்தது. 2 பேரிடம் இருந்தும் ரூ.46 லட்சத்து 92 ஆயிரம் மதிப்புள்ள 1 கிலோ 62 கிராம் தங்கத்தை சுங்க இலாகா அதிகாரிகள் பறிமுதல் செய்தனர். இது தொடர்பாக 2 பேரையும் கைதுசெய்து விசாரித்து வருகின்றனர்.