மணல் கடத்திய மாட்டு வண்டிகள் பறிமுதல்; 2 பேர் கைது

விக்கிரமங்கலம்:

அரியலூர் மாவட்டம் விக்கிரமங்கலம் போலீஸ் சப்-இன்ஸ்பெக்டர் சாமிதுரை மற்றும் போலீசார் முத்துவாஞ்சேரி பகுதியில் ரோந்து பணியில் ஈடுபட்டனர். அப்போது முத்துவாஞ்சேரி- தூத்தூர் சாலையில் 2 மாட்டு வண்டிகளில் வந்தவர்களை மறித்து சோதனை செய்தனர். இதில் அந்த மாட்டு வண்டிகளில் முத்துவாஞ்சேரி கொள்ளிடம் ஆற்றுப் படுகை பகுதிகளில் இருந்து சாத்தம்பாடி பகுதிகளுக்கு மணல் கடத்தியது தெரியவந்தது. இதையடுத்து போலீசார் 2 மாட்டு வண்டிகளையும் பறிமுதல் செய்தனர். மேலும் இது குறித்து வழக்குப்பதிவு செய்து மாட்டு வண்டிகளை ஓட்டி வந்த சாத்தம்பாடி வடக்கு தெருவை சேர்ந்த முருகேசன்(வயது 45), ராஜா(37) ஆகியோரை கைது செய்து விசாரணை நடத்தி வருகிறார்கள்.