முதியவர் தூக்குப்போட்டு தற்கொலை

நெல்லை:

பாளையங்கோட்டை அருகே உள்ள அரியகுளம் தளவாய்புரம் பகுதியை சேர்ந்தவர் மனோகர பாண்டியன் (வயது 60). இவர் கடந்த சில ஆண்டுகளுக்கு முன்பு தனது முதல் மனைவியை பிரிந்து வேறொரு பெண்ணை 2-வதாக திருமணம் செய்து கொண்டு நெல்லை ரெட்டியார்பட்டி அருகே உள்ள இட்டேரி பகுதியில் வசித்து வந்தார்.

இந்த நிலையில் 2-வது மனைவியின் உறவினர்கள் நேற்று முன்தினம் மனோகர பாண்டியன் இறந்துவிட்டதாக அவரது முதல் மனைவியின் மகன் ரமேஷ் குமாருக்கு தகவல் தெரிவித்தனர். உடனே ரமேஷ் குமார் மற்றும் உறவினர்கள் அங்குசென்று மனோகர பாண்டியன் உடலை சொந்த ஊருக்கு எடுத்து வந்தனர். பின்னர் அவருக்கு இறுதி சடங்குகள் செய்தபோது அவரது கழுத்தில் காயம் இருந்துள்ளது. இதில் அதிர்ச்சி அடைந்த ரமேஷ்குமார், தனது தந்தையின் சாவில் மர்மம் இருப்பதாக முன்னீர்பள்ளம் போலீசில் புகார் அளித்தார். அதன்பேரில் இன்ஸ்பெக்டர் தில்லை நாகராஜன் வழக்குப்பதிவு செய்து விசாரணை நடத்தினார்.

விசாரணையில், மனோகர பாண்டியன் தூக்குப்போட்டு தற்கொலை செய்து கொண்டது தெரியவந்தது. உடனே போலீசார் அவரது உடலை கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர்.