கொண்டலாம்பட்டி அருகே முதியவர் தீயில் கருகி பலி-நெருப்பு மூட்டி குளிர் காய்ந்த போது விபரீதம்

கொண்டலாம்பட்டி:

சேலம் கொண்டலாம்பட்டி அருகே உள்ள அரியாம்பாளையத்தை சேர்ந்தவர் கந்தசாமி (வயது 85). இவர் வயது முதிர்வு காரணமாக வீட்டிலேயே இருந்து வந்தார். இந்த நிலையில் குளிர் காலம் என்பதால் குளிர் காய்வதற்காக காலையில் காய்ந்த சருகுகளை குவித்து அதில் தீ மூட்டி குளிர் காய்ந்து கொண்டிருந்தார். இந்த நிலையில் குளிர் காய்ந்து கொண்டிருந்த முதியவர் எதிர்பாராதவிதமாக தவறி தீயில் விழுந்து விட்டார். காலை நேரம் என்பதால் இதை யாரும் கவனிக்காத நிலையில் அவர் தீயில் கருகி பலியானார். இந்த சம்பவம் குறித்து தகவல் கிடைத்ததும், கொண்டலாம்பட்டி போலீசார் சம்பவ இடத்திற்கு விரைந்து சென்று இறந்த முதியவரின் உடலை கைப்பற்றி பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். இந்த சம்பவம் தொடர்பாக கொண்டலாம்பட்டி போலீஸ் இன்ஸ்பெக்டர் செல்வராஜ் வழக்குப்பதிவு செய்து விசாரித்து வருகிறார்.