<
வேலூர் மாநகராட்சி தேர்தல் முடிவுகள் பிற்பகல் 3 மணிக்குள் தெரிந்து விடும் கலெக்டர் தகவல்
வேலூர் மாநகராட்சியில் பதிவான வாக்குகள் 18 சுற்றுகளாக எண்ணப்படுகிறது. தேர்தல் முடிவுகள் பிற்பகல் 3 மணிக்குள் தெரிந்து விடும் விடும் என்று கலெக்டர் குமாரவேல்பாண்டியன் கூறினார்.
வேலூர்
வேலூர் மாநகராட்சியில் பதிவான வாக்குகள் 18 சுற்றுகளாக எண்ணப்படுகிறது. தேர்தல் முடிவுகள் பிற்பகல் 3 மணிக்குள் தெரிந்து விடும் என்று கலெக்டர் குமாரவேல்பாண்டியன் கூறினார்.
ஆலோசனை கூட்டம்
வேலூர் கலெக்டர் அலுவலகத்தில் நகர்ப்புற உள்ளாட்சி தேர்தல் வாக்கு எண்ணிக்கை தொடர்பான ஆலோசனை கூட்டம் வீடியோ கான்பரன்சிங் மூலம் நேற்று நடந்தது. அதைத்தொடர்ந்து வேலூர் மாவட்ட தேர்தல் அலுவலரும், கலெக்டருமான குமாரவேல்பாண்டியன் நிருபர்களுக்கு பேட்டியளித்தார். அப்போது அவர் கூறியதாவது:-
வேலூர் மாவட்டத்தில் நகர்ப்புற உள்ளாட்சி தேர்தல் வாக்கு எண்ணிக்கை நாளை (அதாவது இன்று) காலை 8 மணிக்கு தொடங்குகிறது. முதலில் தபால் ஓட்டுகள் எண்ணப்படும். அதன்பின்னர் மின்னணு வாக்குப்பதிவு எந்திரத்தில் பதிவான வாக்குகள் எண்ணிக்கை நடைபெறும். தபால்ஓட்டு மற்றும் எந்திரத்தில் பதிவான வாக்குகள் முழுமையாக எண்ணி முடித்த பின்னரே ஒவ்வொரு வார்டின் முடிவுகள் வெளியிடப்படும். தபால் ஓட்டுகள் தலைமை ஏஜென்டுகள் முன்னிலையில் பிரித்து எண்ணப்படும். இதில் எந்தவித புகாரும் வராத வண்ணம் எண்ணிக்கை நடத்த நடவடிக்கை எடுக்கப்பட்டுள்ளது.
3 மணிக்குள் தெரிந்துவிடும்
வேலூர் மாநகராட்சியில் பதிவான வாக்குகள் 18 சுற்றுகளாக எண்ணப்பட உள்ளன. இதற்காக 30 மேஜைகள் தயார் நிலையில் வைக்கப்பட்டுள்ளன. ஒவ்வொரு வார்டு வாக்கு எண்ணிக்கை முடிந்ததும் முடிவுகள் அறிவிக்கப்படும். அதிகபட்சமாக ஒரு வார்டில் 13 வாக்குச்சாவடிகளே பயன்படுத்தப்பட்டுள்ளன. இதனால் நாளை பிற்பகல் 3 மணிக்குள் மாநகராட்சி தேர்தல் முடிவுகள் முழுமையாக தெரிந்து விடும்
நகராட்சிகள், பேரூராட்சிகளில் குறைந்த அளவிலான வார்டுகளே உள்ளன. அங்கு 5 முதல் 8 சுற்றுகளாக வாக்குகள் எண்ணப்படுகிறது. நகராட்சிகள், பேரூராட்சிகளில் வாக்கு எண்ணிக்கை தொடங்கிய 2 மணி நேரத்திற்குள் முடிவுகள் முழுமையாக வெளியாகிவிடும். வேலூர் மாநகராட்சி வாக்கு எண்ணும் பணியில் மொத்தம் 140 பேர் ஈடுபட உள்ளனர். அதைத்தவிர 200 அரசு ஊழியர்கள் மற்ற பணிகளில் ஈடுபடுவார்கள்.
1,015 போலீசார் பாதுகாப்பு
ஒவ்வொரு வார்டு வாக்கு எண்ணிக்கையின் போதும் அந்த வார்டில் போட்டியிடும் வேட்பாளர்கள் மற்றும் அவர்களின் முகவர்கள் மட்டுமே உள்ளே செல்ல அனுமதிக்கப்படுவார்கள். அந்த வார்டு வாக்கு எண்ணிக்கை முடிந்து முடிவுகள் அறிவிக்கப்பட்டதும் அவர்கள் அங்கிருந்து வெளியேற்றப்படுவார்கள். அதன்பின்னர் அடுத்து எண்ணப்படும் வார்டுகளின் வேட்பாளர்கள் மற்றும் முகவர்கள் அனுமதிக்கப்படுவார்கள். மாவட்டம் முழுவதும் வாக்கு எண்ணிக்கை மையத்தின் உள், வெளிப்பகுதிகள் மற்றும் முக்கிய இடங்களில் 1,015 போலீசார் பாதுகாப்பு பணியில் ஈடுபடுத்தப்படுகின்றனர்.
வாக்கு எண்ணும் மையத்துக்குள் சட்டமன்ற, பாராளுமன்ற உறுப்பினர்கள் செல்ல அனுமதி கிடையாது. வார்டு வேட்பாளர்கள், முகவர்கள் மட்டுமே அனுமதிக்கப்படுவார்கள். வாக்கு எண்ணும் மையத்துக்குள் செல்போன் பயன்படுத்த தடை விதிக்கப்பட்டுள்ளது. மாவட்டத்தில் தேர்தல் தொடர்பாக ஒரு வழக்கும், தேர்தல் விதிமீறல் தொடர்பாக 28 வழக்கும் பதியப்பட்டுள்ளன. தேர்தல் வெற்றி கொண்டாட்டத்தில் பொதுஇடத்தில் பட்டாசு வெடிக்க தடை செய்யப்பட்டுள்ளது. பொதுமக்களுக்கு இடையூறு ஏற்படுத்தும் வகையில் நடந்து கொண்டால் அவர்கள் மீது வழக்குபதிவு செய்து நடவடிக்கை எடுக்கப்படும்.
இவ்வாறு கலெக்டர் கூறினார்.
பேட்டியின்போது மாவட்ட தேர்தல் பார்வையாளர் பிரதாப், போலீஸ் சூப்பிரண்டு ராஜேஷ்கண்ணன், வேலூர் மாநகராட்சி கமிஷனர் அசோக்குமார், மாநகராட்சி தேர்தல் பார்வையாளர் அஜய் சீனிவாசன், கலெக்டரின் நேர்முக உதவியாளர் (தேர்தல்) கிருஷ்ணமூர்த்தி மற்றும் பலர் உடனிருந்தனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
