மோட்டார் சைக்கிளில் இருந்து தவறி விழுந்து வாலிபர் சாவு

சிவகிரி:

சிவகிரி கீழ மாரியம்மன் கோவில் தெருவை சேர்ந்த துரைராஜ் மகன் கார்த்திகேயன் (வயது 32). பட்டதாரி வாலிபரான இவர் நேற்று முன்தினம் மோட்டார் சைக்கிளில் வாசுதேவநல்லூரில் உள்ள உறவினரை பார்த்துவிட்டு ஊருக்கு திரும்பி வந்து கொண்டிருந்தார். சிவகிரிக்கு தெற்கே வெற்றிலை மண்டபம் அருகே பெட்ரோல் பங்க் முன்பாக வந்தபோது மோட்டார் சைக்கிளில் இருந்து திடீரென நிலைதடுமாறி கார்த்திகேயன் கீழே விழுந்தார். இதனால் பலத்த காயம் அடைந்த அவர் சம்பவ இடத்திலேயே துடிதுடித்து இறந்தார்.

தகவல் அறிந்ததும் சிவகிரி போலீஸ் இன்ஸ்பெக்டர் மனோகரன் தலைமையில் போலீசார் சம்பவ இடத்திற்கு விரைந்து வந்தனர். கார்த்திகேயன் உடலை கைப்பற்றி பரிசோதனைக்காக சிவகிரி அரசு ஆஸ்பத்திரிக்கு அனுப்பி வைத்தனர். இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.