கிணற்றில் தவறி விழுந்த விவசாயி உயிருடன் மீட்பு

உடையார்பாளையம்:

அரியலூர் மாவட்டம் உடையார்பாளையத்தை அடுத்த வெண்மான்கொண்டான் கிராமத்தை சேர்ந்தவர் மகாராஜன்(வயது 45). விவசாயி. இவர் நேற்று முன்தினம் நள்ளிரவில் தூங்கி எழுந்து சிறுநீர் கழிக்க வெளியில் வந்தபோது அருகே உள்ள தண்ணீர் இல்லாத கிணற்றில் விழுந்துள்ளார். அவரது அலறல் சத்தம் கேட்டு அங்கு ஓடி வந்த அக்கம், பக்கத்தினர் கிணற்றுக்குள் பார்த்தபோது மகாராஜன் காயங்களுடன் கிடந்தது தெரியவந்தது. இதுபற்றி ஜெயங்கொண்டம் தீயணைப்பு துறையினருக்கு தகவல் தெரிவிக்கப்பட்டது. இதையடுத்து சம்பவ இடத்திற்கு வந்த தீயணைப்பு துறை நிலைய அலுவலர் மோகன்ராஜ் தலைமையிலான வீரர்கள் கிணற்றுக்குள் விழுந்த மகாராஜனை கயிறு கட்டி பத்திரமாக மீட்டனர். பின்னர் மகாராஜனை சிகிச்சைக்காக ஜெயங்கொண்டம் அரசு ஆஸ்பத்திரிக்கு அனுப்பி வைத்தனர். இது குறித்து உடையார்பாளையம் போலீசார் விசாரணை மேற்கொண்டு வருகின்றனர்.