மறைமுக தேர்தலில் தி மு க வேட்பாளர் வெற்றி திருக்கோவிலூர் நகரசபை தலைவராக டி என் முருகன் பதவி ஏற்பு

திருக்கோவிலூர்

நகராட்சியை கைப்பற்றிய தி.மு.க.

திருக்கோவிலூர் நகராட்சியில் மொத்தம் 27 வார்டுகள் உள்ளன. கடந்த மாதம் நடந்த நகர்ப்புற உள்ளாட்சி தேர்தலில் தி.மு.க. 19 வார்டுகளிலும், அ.தி.மு.க. 5, சுயேச்சை வேட்பாளர்கள் 3 வார்டுகளிலும் வெற்றிபெற்றனர்.

இதன் மூலம் அதிக வார்டுகளில் வெற்றிபெற்றதால் திருக்கோவிலூர் நகராட்சியை பெரும்பான்மையுடன் தி.மு.க. கைப்பற்றியது. இதில் வெற்றிபெற்ற அனைத்து கவுன்சிலர்களும் கடந்த 2-ந் தேதி நகராட்சி அலுவலகத்தில் பதவி ஏற்றுக்கொண்டனர்.

நகரசபை தலைவர்

இதைத் தொடர்ந்து நகரசபை தலைவர் மற்றும் துணை தலைவரை தேர்ந்தெடுப்பதற்கான மறைமுக தேர்தல் நகராட்சி அலுவலகத்தில் நேற்று  நடைபெற்றது. அதாவது காலையில் நகரசபை தலைவருக்கான தேர்தலும், மதியம் நகரசபை துணை தலைவருக்கான மறைமுக தேர்தலும் நடைபெற்றது.

இதில் திருக்கோவிலூர் நகரசபை தலைவராக 12-வது வார்டு தி.மு.க. கவுன்சிலரும், விழுப்புரம் மத்திய மாவட்ட தி.மு.க. துணை செயலாளருமான டி.என்.முருகன் தேர்ந்தெடுக்கப்பட்டார். அவருக்கு தேர்தல் நடத்தும் அலுவலரும், நகராட்சி ஆணையருமான கீதா பதவி பிரமாணம் செய்து வைத்தார். 

அமைச்சர் பொன்முடி வாழ்த்து

இதையடுத்து நிகழ்ச்சியில் கலந்துகொண்ட உயர் கல்வித்துறை அமைச்சர் பொன்முடி நகரசபைத் தலைவராக தேர்வு செய்யப்பட்ட டி.என்.முருகனை தலைவருக்கான இருக்கையில் அமரவைத்து சால்வை அணிவித்தும் பூங்கொத்து கொடுத்தும் வாழ்த்துக்களை தெரிவித்தார். நகரசபை அலுவலகம் முன்பு தி.மு.க.வினர் மற்றும் டி.என். முருகனின் ஆதரவாளர்கள் பட்டாசு வெடித்து மகிழ்ச்சியை வெளிப்படுத்தினர். 

தொடர்ந்து மாலையில் நடைபெற்ற துணை தலைவர் பதவிக்கான தேர்தலில் 11-வது வார்டு தி.மு.க. கவுன்சிலர் உமாமகேஸ்வரிகுணா தேர்வு செய்யப்பட்டார். அவரும் உடனடியாக பதவி ஏற்றுக்கொண்டார். புதிதாக தேர்ந்தெடுக்கப்பட்ட நகரசபை தலைவர் மற்றும் துணை தலைவருக்கு சக கவுன்சிலர்கள், கட்சி நிர்வாகிகள், முக்கிய பிரமுகர்கள் வாழ்த்துக்களை தெரிவித்தனர். 

வாழ்க்கை குறிப்பு

திருக்கோவிலூர் நகரசபை தலைவராக தேர்ந்தெடுக்கப்பட்ட டி.என்.முருகன் (வயது 52) ரியல் எஸ்டேட் மற்றும் வட்டி கடை தொழில் செய்து வருகிறார். இவருக்கு 2 பெண் குழந்தைகள் உள்ளனர். விழுப்புரம் மத்திய மாவட்ட தி.மு.க. துணை செயலாளராக கடந்த 3 ஆண்டுகளாக பதவி வகித்து வருகிறார். இவர் கடந்த 40 ஆண்டுகளுக்கு மேலாக தி.மு.க.வில் இருக்கிறார்.

அதேபோல் நகரசபை துணை தலைவரான உமாமகேஸ்வரி குணாவின் (45) கணவர் டி.குணா பைனான்ஸ் தொழில் செய்து வருகிறார். இவருக்கு ஒரு மகள், மகன் ஆகியோர் உள்ளனர். தி.மு.க.வில் நகர இளைஞரணி அமைப்பாளராக பதவி வகித்த இவர் இதற்கு முன்பு 3 முறை பேரூராட்சி மன்ற உறுப்பினர் ஆகவும் ஒரு முறை பேரூராட்சி மன்ற துணை  தலைவராகவும் பதவி வகித்துள்ளார். கடந்த 25 ஆண்டுகளுக்கு மேலாக தி.மு.க. வில் இருக்கிறார்.