மின்சாரம் பாய்ந்து வாலிபர் பலி

அன்னவாசல் அருகே உள்ள அகரப்பட்டியை சேர்ந்தவர் பிச்சைமுத்து. இவரது மகன் முருகேசன் (வயது 25). இவர் வெளிநாட்டில் இருந்து ஊருக்கு வந்துள்ளார். இந்தநிலையில் மேய்ச்சலுக்கு சென்ற மாடு இரவு வரை வீடுதிரும்பவில்லை என முருகேசனும், அவரது உறவினர் ஒருவரும் அப்பகுதி முழுவதும் மாட்டை தேடி அலைந்துள்ளனர். இந்த நிலையில் அதே பகுதியில் உள்ள கார்டன் பகுதிக்குள் மாடு சென்று இருக்கலாம் என்று நினைத்து முருகேசன் உள்ளே சென்றபோது அந்த கார்டனில் கடலை பயிரில் எலிகள் செல்லாமல் இருக்க மின்கம்பி அமைக்கப்பட்டிருந்ததை கவனிக்காத முருகேசன் மின்கம்பியில் மிதித்ததில் மின்சாரம் பாய்ந்து பரிதாபமாக இறந்தார். இதுகுறித்து தகவல் அறிந்த அன்னவாசல் போலீசார் சம்பவ இடத்திற்கு விரைந்து வந்து முருகேசன் உடலை மீட்டு பிரேத பரிசோதனைக்காக புதுக்கோட்டை அரசு மருத்துவமனைக்கு அனுப்பி வைத்தனர். மேலும் இதுகுறித்து கார்டன் உரிமையாளர் அகரப்பட்டியை சேர்ந்த முருகேசன் என்பவர் மீது போலீசார் வழக்குப்பதிவு செய்து விசாரணை நடத்தி வருகின்றனர்.