வெவ்வேறு விபத்துகளில் 2 பேர் பலி

ராஜபாளையம்,

ராஜபாளையம் அருகே வெவ்வேறு விபத்துகளில் 2 பேர் பலியாகினர். 

ராஜபாளையம் அருகே சட்டிகிணறு மாரியம்மன் கோவில் நடுத்தெருவை சேர்ந்தவர் பெருமாள் (வயது65). இவரது மகள் வெங்கடேஸ்வரி (42). இவர்கள் இருவரும் இருசக்கர வாகனத்தில் ராஜபாளையத்தில் உறவினர்கள் வீட்டு திருமண விழாவில் கலந்து கொண்டு விட்டு ஊருக்கு சத்திரப்பட்டி வழியாக சென்று கொண்டிருந்தனர். 

அப்போது சமுசிகாபுரம் பஸ் நிறுத்தம் அருகே அவர்களுக்கு பின்னால் வந்த அரசு பஸ் அவர்களது இருசக்கர வாகனம் மீது மோதியதாக கூறப்படுகிறது. இதில் 2 பேரும் காயம் அடைந்தனர். ஆனால் சம்பவ இடத்திலேயே  வெங்கடேஸ்வரி பரிதாபமாக உயிரிழந்தார். இதுகுறித்து ராஜபாளையம் தெற்கு போலீசார் வழக்குப்பதிவு செய்து விசாரணை நடத்தி வருகின்றனர். 

அதேபோல ராஜபாளையம் அருகே சொக்கநாதன்புத்தூரை சேர்ந்தவர் கோபாலகிருஷ்ணன் (49). இவர் உரக்கடையில் வேலை செய்து வந்தார்.  இந்தநிலையில் உரக்கடைக்கு செல்வதற்காக அதே ஊரை சேர்ந்த முனீஸ்வரன் என்பவரது இருசக்கர வாகனத்தில் பின்னால் அமர்ந்து சென்றுள்ளார். தென்காசி சாலையில் சென்று கொண்டிருந்த போது திடீரென கோபாலகிருஷ்ணன் தடுமாறி சாலையில் விழுந்ததாகவும் கூறப்படுகிறது. 

உடனே அவரை மீட்டு ராஜபாளையம் தனியார் மருத்துவமனையில் சிகிச்சைக்காக சேர்த்தனர். அங்கு அவருக்கு முதலுதவி சிகிச்சை அளிக்கப்பட்டு பின்னர் அவர் மேல் சிகிச்சைக்காக மதுரையில் உள்ள தனியார் மருத்துவமனையில் சேர்த்தனர். அங்கு அவரை பரிசோதித்த டாக்டர்கள் அவர் இறந்து விட்டதாக கூறினர். இதுகுறித்து ராஜபாளையம் தெற்கு போலீசார் விசாரணை நடத்தி வருகின்றனர்.