ஈரோட்டில் மாநில அளவிலான நீச்சல் போட்டி; 150 மாணவ- மாணவிகள் பங்கேற்பு

ஈரோடு

ஈரோட்டில் நடந்த மாநில அளவிலான நீச்சல் போட்டியில் 150 மாணவ-மாணவிகள் பங்கேற்றனர்.

ஈரோடு மாவட்ட நீச்சல் கழகம் சார்பில், ஈரோடு கருங்கல்பாளையம் பகுதியில் உள்ள சோளீஸ் ஸ்போர்ட்ஸ் நீச்சல் குளத்தில் நேற்று மாநில அளவிலான நீச்சல் போட்டிகள் நடந்தது. இந்த போட்டிக்கு மாவட்ட நீச்சல் கழக செயலாளர் எஸ்.ரமேஷ் தலைமை தாங்கினார். சோளீஸ் ஸ்போர்ட்ஸ் நிர்வாக இயக்குனர் குமரவேல் முன்னிலை வகித்தார்.

திருமகன் ஈவெரா எம்.எல்.ஏ., எம்.சி.ஆர். நிறுவனத்தின் நிர்வாக இயக்குனர் எம்.சி.ராபின் ஆகியோர் சிறப்பு அழைப்பாளர்களாக கலந்து கொண்டு போட்டிகளை தொடங்கி வைத்தனர். சாதாரண நீச்சல், பின்புற நீச்சல், தவளை நீச்சல், வண்ணத்துப்பூச்சி நீச்சல் ஆகிய பிரிவுகளில் 25 மீட்டர், 50 மீட்டர், 100 மீட்டர் தனிநபர் போட்டிகள் நடத்தப்பட்டது.

2-ம் வகுப்பு, 4-ம் வகுப்பு, 6-ம் வகுப்பு, 8-ம் வகுப்பு, 10-ம் வகுப்புகளுக்கு உள்பட்ட மாணவ-மாணவிகள் மற்றும் பொது பிரிவுகளில் மொத்தம் 66 வகையான போட்டிகள் நடத்தப்பட்டது. இந்த போட்டியில் ஈரோடு, நாமக்கல், திருச்சி, கோவை, கரூர், திருப்பூர், திண்டுக்கல், சேலம், கன்னியாகுமரி, திருநெல்வேலி, மதுரை, சென்னை உள்பட பல்வேறு மாவட்டங்களை சேர்ந்த 150-க்கும் மேற்பட்ட மாணவ-மாணவிகள் கலந்து கொண்டு தங்களது திறமைகளை வெளிப்படுத்தினார்கள்.

அதைத்தொடர்ந்து வெற்றிபெற்ற வீரர்-வீராங்கனைகளுக்கு பரிசளிப்பு விழா நடந்தது. விழாவில் மாவட்ட போலீஸ் சூப்பிரண்டு சசிமோகன் கலந்து கொண்டு முதல் 3-ம் இடங்களை பிடித்தவர்களுக்கு சான்றிதழ், பதக்கம் மற்றும் பரிசுகளை வழங்கினார். விழாவில் ஈரோடு மாவட்ட நீச்சல் கழக தலைவர் சஞ்சீவ்குமார் அகர்வால், நீச்சல் பயிற்சியாளர்கள் ராஜா, ரஞ்சித்குமார் மற்றும் மாணவ-மாணவிகள், பெற்றோர்கள் கலந்து கொண்டனர்.