2-ம் ஆண்டு நினைவு நாள் அனுசரிப்பு:பேராசிரியர் அன்பழகனின் உருவப்படத்துக்கு உதயநிதி ஸ்டாலின் எம்.எல்.ஏ. அஞ்சலி

சேலம்:

சேலம் மத்திய மாவட்ட தி.மு.க. சார்பில் மறைந்த தி.மு.க. பொதுச்செயலாளர் பேராசிரியர் அன்பழகனின் 2-ம் ஆண்டு நினைவு நாள் நேற்று அனுசரிக்கப்பட்டது. இதையொட்டி சேலம் புதிய பஸ் நிலையம் அருகே உள்ள மாவட்ட கட்சி அலுவலகத்தில் அலங்கரித்து வைக்கப்பட்டிருந்த பேராசிரியர் அன்பழகனின் உருவப்படத்துக்கு மாநில இளைஞரணி செயலாளர் உதயநிதி ஸ்டாலின் எம்.எல்.ஏ. மலர்தூவி அஞ்சலி செலுத்தினார். இதைத்தொடர்ந்து மத்திய மாவட்ட செயலாளர் வக்கீல் ராஜேந்திரன் எம்.எல்.ஏ., எஸ்.ஆர்.பார்த்திபன் எம்.பி., மாநகராட்சி மேயர் ராமச்சந்திரன் ஆகியோரும் பேராசிரியர் அன்பழகனின் உருவப்படத்துக்கு மலர்தூவி அஞ்சலி செலுத்தினர்.

நிகழ்ச்சியில், மாவட்ட அவைத்தலைவர் கலையமுதன், மாவட்ட பொருளாளர் சுபாஷ், மாநகர செயலாளர் ஜெயக்குமார் உள்பட தலைமை செயற்குழு உறுப்பினர்கள், பகுதி செயலாளர்கள், மாநகராட்சி கவுன்சிலர்கள், கட்சி நிர்வாகிகள் பலர் கலந்து கொண்டனர்.