மாற்றுத்திறனாளி மாணவர்களுக்கான விழிப்புணர்வு ஊர்வலம்

கந்தர்வகோட்டையில் ஒருங்கிணைந்த பள்ளி கல்வித்துறையின் சார்பில்,  மாற்றுத்திறன் கொண்ட மாணவர்களுக்கான விழிப்புணர்வு ஊர்வலம் நடைபெற்றது. இதற்கு ஊராட்சி மன்ற தலைவி தமிழ்ச்செல்வி தலைமை தாங்கி, ஊர்வலத்தை கொடியசைத்து தொடங்கி வைத்தார். ஊராட்சி ஒன்றிய நடுநிலைப்பள்ளியில் இருந்து தொடங்கிய ஊர்வலம் காந்திசிலை, தஞ்சாவூர் சாலை வழியாக கந்தர்வகோட்டை பஸ் நிலையத்தில் வந்து முடிவடைந்தது. ஊர்வலத்தில், மாற்றுத்திறன் கொண்ட மாணவர்களை அதிக அளவில் பள்ளியில் சேர்க்க வேண்டும் என்பது போன்ற வாசகங்கள் அடங்கிய பதாகைகளை பிடித்தவாறு கோஷங்களை எழுப்பி மாணவர்கள் சென்றனர். இதில் நடுநிலைப்பள்ளியின் தலைமை ஆசிரியை விஜயலட்சுமி, வட்டார வள மைய மேற்பார்வையாளர் பிரகாஷ் (பொறுப்பு), ஆசிரியர்கள், பயிற்றுனர்கள் உள்பட பலர் கலந்து கொண்டனர்.